Qilalukkat qernertat silap pissusiata allanngoriartornerata ilutigisaanik avannarparteriartuaarumaartut

Immap sikua aakkiartorpoq, imaq kissatsikkiartorpoq nerisassallu ikilillutik.

Qilalukkat qernertat nunatta imartaaniittut silap pissusiata allanngoriartorneranit eqqugaajumaarput. Taamaattumik uumaffigisassaminnut minnermut ukiuni 80-ini tulliuttuni avannarparteriartuaarumaarput.

Tamanna qilalukkat qernertat qanga ingerlaarfii siunissamilu ingerlaarfigilerumaagaat pillugit ilisimatusaammi, Pinngortitaleriffimmit peqataaffigineqartumit isummiunneqarpoq.

Qilalukkat qernertat silap pissusiata allanngoriartornerata ilutigisaanik qanoq avannarparteriartuaartigissanersut, erseqqissumik oqaatigineqarsinnaanngikkallartoq, Pinngortitaleriffimmi ilisimatoq Eva Garde oqarpoq. Tunumili qilalukkat qernertat avannarpartilereersimasut, taassuma erseqqissaatigaa.

- Qilalukkat qernertat ikiliartorlutillu avannarparteriartuaarpasipput, taanna oqarpoq imalu itisiliilluni:

- Qilalukkat qernertat Kalaallit Nunaata imartaaniittut silaannaap kissatsikkiartornerani, tamatumalu ilutigisaanik allanik nerisaqalernerat nerisassaalatsilernerallu - piniarneqarnerallumi - pissutaallutik ikiliartornissaat aarleqqutigisinnaavarput. Taamaattumik qilalukkat qernertat Kalaallit Nunaata imartaaniittut ilaat aarlerinartorsioqaat.

Qilalugaq qernertaq issittup imartaani sikulimmi uumasuukkajuppoq. Ingammik nunatta Canadallu imartaat assigiinngitsunik qilalukkanik qernertaqatigiiaarpassuaqarput, taakkulu Norge Ruslandillu eqqaanni aamma takussaasarput. Taamaattumik nungunnissaat, Eva Gardep ernummatiginngilaa.

- Ataatsimut isigalugu qilalukkat qernertat aniguissaqqaarput, taanna oqarpoq.

Qilalukkat qernertat tamarmik imminnut assingusut

Qilalukkap qernertap tuugaaqarnini pissutigalugu arfernut allanut assingunngilaq. Paarlattuanilli qilalukkat qernertat tamarmik imminnut assingorrapput.

Kigutilissuilli taamaallaat qilalukkat qernertatulli imminnut assingorrapput. Taamaattumik qilalukkat qernertaqatigiiaat assigiinngitsut siornatigut ilisimatusaatini immikkoortikkuminaatsinneqartarsimapput.

Taamaattumik ilisimatuut qilalukkat qernertaqatigiiaat soorliit ataqatigiinnersut paasiniarlugu taakku sananeqaataat tamatumuuna annerusumik misissorpaat.

AAMMA ATUARUK Tunumi piniartut: Qilalukkat naammapput

Assersuutigalugu Tunumi qilalukkat qernertat Inngikitsullip eqqaaneersunit allaanerusut ilisimatusaammi erserpoq. Paasisaq tamanna qilalukkat qernertat ingerlaarnerisa Pinngortitaleriffmmi ilisimatusaatiginerini atorneqarsinnaavoq. 

- Kalaallit Nunaata sua qernertanik qilalugaqarfiua, taakkulu aasakkut ukiukkullumi sumukartarpat, aamma Canadami Kalaallit Nunaanniluunniit pisarineqartarpat? Apeqqutit taakku akissutissarserusoqisatta ilagaat, Eva Garde oqarpoq.

AAMMA ATUARUK Nalunaarusiami: Tunumi qilalukkat qernertat aarlerinartorsiortitaapput

Qilalukkat qernertat ingammik silap pissusiata allanngoriartorneranit qanoq sunnertinneqartigisimanersut paaserusulluinnakkatik ilagigaat, taanna nassuiaavoq.  

- Ingammik Issittumi sumiiffiit ilaanni immap kissatsikkiartornera immallu sikuata aakkiartornera eqqarsaatigalugit. Tamakku qilalukkat qernertat sunniuteqarput. Qanoq sunniuteqartiginersut oqaatigisinnaanngikkallarparput, immamili kissarnerusumiikkusuttanngillat.

Uumaffigilerumaagaat procentinik 25-nik minnerusoq

Eva Gardep oqarnera naapertorlugu qilalukkat qernertat imminnut assingorrannerat qangarsuaq ikilerujussuarnerannik peqquteqarsorineqarpoq. Tamanna silap pissusiata allanngoriartorneranik allanillu uumaffeqalersimanerannik aallaaveqartoq ilimagineqarpoq.

Ilisimatuut sumiiffinni assigiinngitsuni qilalukkat qernertat katillutik 121-t sananeqaataat misissuinerminni ilisimatusaatigaat. Tamatuma saniatigut sumiiffinni assigiinngitsuni immap itissusianik kissassusianillu uuttortaanernit ukiut tuusintilikkuutaat ingerlaneranni nalunaarsukkat misissoqqissaarlugillu immap sikuata ukiuni aggersuni angissusissaa missiliorpaat.

Qilalukkat qernertat 2100-mi uumaffigisaat maanna uumaffigisaannit procentinik 25-nik minerujumaartoq, misissuinermi siulittuutigineqarpoq. Tamannali qulakkiivinneqarani.