Nalunaarusiami: Tunumi qilalukkat qernertat aarlerinartorsiortitaapput

Tunumi nunap allanngutsaaliukkap kujasissortaani qilalukkat qernertat aarlerinartorsiortitaaqisut, NAMMCO-p nalunaarusiaani nutaami uppersarneqarpoq. Aarlerinartorsiortitaanerat arlalinnik pissuteqartoq, Pinngortitaleriffiup immikkoortortaqarfiani pisortaq, Fernando Ugarte, erseqqissaavoq. 

AAMMA ATUARUK Naalakkersuisut qernertanik qilalugartassiissutit ilaqqinniarnagit nalunaareeraluarlutik ilavaat

- Siullertut qernertanik qilalugaqassuseq eqqarsaatigalugu qilalugartarineqartartut amerlavallaarnerannik pissuteqarpoq. Aappaattullu immap kissatsikkiartorneranik pissuteqarluni. Qilalukkat qernertat Issittup imartaanut naleqqussarnikuupput, Tunullu imartaa maanna kissatsikkiartorpoq, Fernando Ugarte oqarpoq.

Tunumi qilalukkanik qernertanik kisitsinermi  qilalukkanut qernertanut missiliuussatut nalunaarsukkat.

Minnerunngitsumillu qilalukkat qernertat perpalummut malussarissuupput. Taamaattumik nipiliorfiuallaartumit sumiiffimmut nipaannerusumukartarput. Soorlu umiarsuit, umiatsiaaqqat inuillu angallannerannut, ukiuni tulliuttuni annertusiartuinnartussamut, malussarissuusut, Fernando Ugartep oqaluttuaraa.

Qilalukkat qernertat nungutitaasinnaasut

Qernertanik qilalugarniartoqartuarsimanerata kinguneri takussaasut, ilisimatuup erseqqissaatigaa.

- Qernertanik qilalugarniartuartoqartillugu Tunumi nunap kujasissortaani qilalukkat qernertat nungutitaassapput, Fernando Ugarte oqarpoq. 

Qilalukkat qernertat inuiaqatigiinni assortuussutaasorujussuupput. Partiit ilai Inatsisartuni ilaasortaatitallit piujuartitsineq tunngavigalugu aqutsinermut tapersiiniarsaripput, ilaali qernertanik killeqanngitsumik qilalugassiisoqartalertariaqarsorinnittut.

Ilisimatuut qilalugartassiissutissatut innersuussinerminnut tunngavilersuutisartagaat oqallisaakkajupput, ilisimatuullu alapernaarsueriaasii najukkani ataasiakkaani innuttaasunit akerlerineqakkajupput. Oqalliseqataasut ilai najukkaminni qernertanik qilalugarpassuaqarneraasarput. Sunaluunniilli nalilersussagaanni allamut naleqqersuunneqartariaqartoq, Fernando Ugartep erseqqissaatigaa.

Amerlasuut naammattuaannartanngillat

- Qilalukkat qernertat ingerlaaqatigiikkajummata siumorneqartartut amerlakkajupput. Qaarsummiitilluni qilalukkat qernertat ingerlaaqatigiikkuutaarpaaluit takussaasarput, taakkuali hunnorujut hunnorujukkuutaaluinnaalluunniit missaaniittarlutik. Qilalugartarineqartartut massakkutulli amerlassuseqartiinnarusukkutsigit qilalukkat qernertat tuusintilippassuusariaqarput, Fernado Ugarte oqarpoq.

Qilalukkallu qernertat piniarneqarnermikkut nungutitaaratarsinnaanerat aalerinartoq, Fernando Ugarte nassuiaavoq.

- Qilalukkat qernertat toqussartik tikillugu ataasiinnarmik sumiiffeqartarput, nungutitaassagaluarunillu qaqugorsuarmi aatsaat qernertanik qilalugaqaqqilissaaq. Assersuutigalugu Nuup Kangerlua qaqortanik qilalugaqarfiunikuuvoq, piniarneqarnermikkulli nungutinneqarnikuupput maannamullu suli pineqqigani, Fernando Ugarte oqarpoq.

AAMMA ATUARUK Qernertanik qilalugartassat ima aalajangersarneqartarput