Naalakkersuisut qernertanik qilalugartassiissutit ilaqqinniarnagit nalunaareeraluarlutik ilavaat
Naak qernertanik qilalugartassiissutit ilaneqaqqinnissaat naalakkersuisut pilersaarutiginngikkaat, Aalisarnernermut Piniarnermullu naalakkersuisup Jens Immanuelsenip arlaleriarluni oqaatigereeraluaraa, assersuutigalugu Qaanaamut Savissivimmullu qernertanik qilalugartassiissutit immikkut ittumik ippassaq tallimanngornermi ilassuteqarfigaat.
Qaanaamummi qilalugartassiissutit 16-inik ilaneqarput, Savissivimmullu sisamanik ilaneqarlutik. Upernavimmut Tasiilamullu qilalugartassiissutit aamma ilaneqarput, tamarmik immikkut aqqaneq-marlunnik ilaneqarlutik.
AAMMA ATUARUK Ingen ekstrakvote til narhvalsfangst i Qaanaaq
Qaanaami qernertanik qilalugartassiissutit ilaneqaqqinnissaat pillugu Qaanaami piniartut ukioq manna aggustip naalernerani akerliussutsiminnik takutitsipput, qernertanimmi qilalugartassiissutit 144-t taamanikkut nungunneqarsimammata.
Siumut, Partii Naleraq, Atassut Nunattalu Qitornai naalakkersuisunut ammasumik septembarimi allagaqaateqarput, qernertanik pisassaaruttunut pisasseeqqittoqarnissaa, naalakkersuisunut ammasumik allagaqaateqarnermikkut piumasaralugu.
Mikivsuk Thomassen, Inuit Ataqatigiinneersoq, naalakkersuisunut taamanikkut allagaqaateqarpoq, qernertanik pisasseeqqittoqarnissaa piumasaralugu.
Sumiiffinnut pineqartunut qernertanik immikkut ittumik pisasseeqqittoqarneratigut, biologit innersuussutaat qaangerlugit maanna pisasseeqqittoqarpoq.
Qaanaamummi 98-inik ukioq manna pisassiisoqarnissaa biologit siunnersuutigaat. Siusinnerusukkut pisassiissutigineqartut saniasigut pisasseeqqittoqarneratigut qernertanik pisassiissutit katillugit 163-inngorput.
