Piniartut qilalugartasseqqinneqarnissaminnik naatsorsuuteqassanngillat, naalakkersuisoq, Jens Imanuelsen oqarpoq.

Piniarnermut naalakkersuisoq: Qaanaamut qernertanik qilalugartasseeqqqissanngilagut

Qaanaami qilalukkanik qernertanik pisassiissutit ilaneqarnissaat, piniartut akerliussutsimik takutitsillutik kissaatigaat. Avannaata Kommunealu maanna tapersiivoq, pisassat 45-nik ilaneqarnissaat kissaatigalugu.

Qaanaami piniartut ukiup massuma ingerlanerinnaani qilalukkat qernertat 144-t pisarai, taamaakkaluartoq suli pisassinneqaqqinnissaminnik piumasaqarlutik. Naalakkersuisorli pisasseeqqikkusunngilaq.

Qaanaami piniartut piumasaqaataat Avannaata Kommuniata ippassaq taperserpaa.

Tassami taavani immikkut pisassiisoqanngippat, qilalukkat qaqortat oktoberimi aatsaat takkusimaalernissaannut, piniartut aningaasarsiorfissaaleqinissaat, Avannaata Kommuniata aarleqqutigaa.

- Tamannalu taavani innuttaasunut sunniuteqarnerluttussaavoq, borgmesteri, Palle Jerimiassen(S) tusagassiuutinut allappoq.

Aalisarnermut piniarnermut nunalerinermut naalakkersuisoq Jens Imanuelsen (S) pisasseeqqinnissamik naatsorsuuteqanngilaq:

- Siusinnerusukkut aalajangerneqarsimavoq ukiumut pisassiissutit ukiup ingerlanerani ilaqattaarneqarnissaat pinaveersaartinneqassasoq, taanna tunngaviuvoq. Pisassiissutit aalajangerneqartarput ukiumiit ukiumut, taamaattumik siunissaq ungasinnerusoq eqqarsaatigalugu qulaajaatitsivunga periarfissat suusinnaanerinik, Aalisarnermut piniarnermut nunalerinermullu naalakkersuisoq, Jens Imanuelsen taama oqarpoq.

AAMMA ATUARUK Qaanaami innuttaasut akerliussutsimik takutitsisut

Piniartut saniatigut Qaanaami innuttaasut ilaat aamma qilalukkanik qernertanik Inughuit Seafood A/S-imi tunisassiorneq inuussutigaat.

- Qilalukkat qernertat piniagaajunnaarmatali tunisassiorfimmi sulisut 15-it eqqugaapput, ilaat allamut suliartortinneqartariaqarsimapput ilaallu allamik suliffissarsiortariaqarsimallutik, Qaanaami tunisassiorfimmi Inughuit Seafoodimi tunisassiornermut pisortaq, Rosa Davidsen KNR-imut oqarluttuarpoq.

Qaanaami qilalukkat qernertat ukioq manna 98-it pisassiissutaapput. Siornali 46-t pisarineqanngitsoorput, taakkualu ukioq manna pisassaasunut ilaapput.

Taarsiullugu allanik inuussutissarsiutaasinaasunik misisuillutik, Jens Imanuelsen oqaluttuarpoq:

- Taamaattumik isertitaqarsinnaaneranut ataavartitsinissaq anguniarlugu puisit amiinik tunisassiornermi periarfissaqartoqarnissaa aqqutissiuunniarsarivarput.

Avannaata Kommuneani pisassiissutit ilaneqarnissaannut nalilersueqqusinerat maanna naalakkersuisumit oqaaseqarfigineqarusunngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat