Qaanaaq: Qaanaami innuttaasut akerliussutsimik takutitsisut

Qaanaami qilalukkat qernertat ukioq manna pisassiissutigineqartut 18-it tamakkerlugit pisarineqarsimalermata, aalisarnermut, piniarnermut nunalerinermullu naalakkersuisoqarfimmit piniagassaaruttoq nalunaarutigaat. Innuttaasunilli tamanna akerlerineqarpoq.
Qaanaami piniartut, aalisartut, Inghuit seafood a/s-imilusulisut ilaqutaallu akerliussutsimik takutitsillutik ingerlaaqatigiittut. Assi © : Arrutaq K’ujaukitsoq
Qaanaami KNAPP-p siulittaasuat, Mads Ole Kristiansen kommunep silataani oqalugiartoq. Assi © : Arrutaq K’ujaukitsoq
Akerliussutsimik takititsisut oqariartuutaasa ilaat. Assi © : Arrutaq K’ujaukitsoq
Avannaata kommuneani Qaanaami kommunalbestyrelsini ilaasortaq, Masauna Petersen kommunep majuartarfianiit oqarlugiartoq. Assi © : Arrutaq K’ujaukitsoq
Allattoq Marie Kûitse Kristensen
aggustip 20-at 2019 16:51

Qaanaami piniartut aalisartullu ullumi marlunngornermi akerliussutsimik takutitsipput. Qilalukkat qernertat Qaanaami avannaaniittumilu Savissivimmi pisassat tamakkerlugit pisarineqarsimalermata, aalisarnermut piniarnermut nunalerinermullu naalakkersuisoqarfimmit piniagassaaruttoq nalunaaruitigaat.

Qaanaami KNAPP-mi siulittaasup, Mads Ole Kristiansenip oqarnera naapertorlugu piniartut kisimik eqqugaanngillat.

- Nunaqqatigiit tamarmik eqqugaasutut oqaatigisinnaavagut. Pequtigalugu taamaasinerani nunaqqatitsinnut neqissaqartitsilluartaratta. Tunitsivippullu suliassaaruppoq, takanani sulisut arlallit eqqugaapput, taakku aamma ilaqutaqarput. Piniartukkormiut aamma meerartallit piniarnerinnarmik inuussutissarsiuteqartut eqqugaanerpaajullutik, qimmillumi nerukkaatissaarupput.

Taarsiiffigineqarusuttut

Qilalukkat qernertat aasaanerani Qaanaap nalaaniitaarput, inuussutigineqartuullutillu. Qilalukkat qaqortat suli piniagaagaluarput taakkuli Qaanaamut ukiakkut aatsaat takkuttartut KNAPP-ip siulittaasua oqaluttuarpoq.

Qalerallit inuussutigineqarsinnaagaluarput qilalukkalli qernertat takkusimaartillugit qalerallit tammarartartut, piniartut aalisartullu siulittaasuat oqaluttuarpoq.

Puisit amiinik Savissivimmi tunitsiveqaraluartoq, Qaanaami tunitsiveqanngilaq (Nunatta ammerivia ilisimatitsivoq). Taamaammat piniartut aalisartullu inuussutissarsiorniarnerat annertuumik kalluarneqarpoq.

Taamaammallu akerliussutsimik takutitsisoqarpoq. Qilalukkat qernertat pisassiissutit ilaneqarnissaat piumasarineqarpoq. Tamannali ajornarpat naalakkersuisoqarfik iliuuseqartariaqarsorineqarpoq.

- Pisortat akiligassanik nassiussuiuartut qanoq iliuuseqartariaqarput. Taarsiissuteqarnissaq eqqarsaatigalugu akiligassallu akilerneqassappata, ilaqutariillu meerartai kaatsinneqassanngippata inatsisitigut piumasaqaatit aallaavigalugit allaqqasoqarpoq meeqqat kaatsinneqassanngitsut. Tamakku eqquutsinneqassappata pisortat pinngitsooratik iliuuseqartariaqarput, Mads Ole Kristiansen oqarpoq.

 

 

qaanaami_akerliussutsimik_takutitsisut.mp4

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq