Tunumi piniartut: Qilalukkat naammapput
Uumassusilerisut Tunumi qilalukkat qernertat nungoratarsinnaanerannik oqarnerat inuit ilaannit upperineqanngilaq.
- Qilalukkat qernertat nungutaalernerannik naliliinerat atuisuusugut upperiuminaatsipparput,
Taamatut qilalukkat nungukkiartorneqaragaanerat naliliinerat uagut atuisut upperiuminaatsipparput, Pele Maratse, KNAPK-ip Kulusummi immikkoortortaqarfiani aamma Tunumi piniartut siunnersuisoqatigiiffianni siulittaasoq taama oqarpoq.
LÆS OGSÅ Rapport: Narhvalerne i Østgrønland har det svært
Pele Maratsi oqaluttuarpoq, piniartut Tasiilamit Ittoqqortoormiiniillu Tasiilap kujataani kangerlunni Skjolungenimit avannamut Mestersvigip tungaanut qilalukkanik qernertanik ukiorpassuarni piniartartut.
- Qangalili piniariartarfiusarmata 70-ikkut nalaanni atuisut, taakkunani nunani, kangerluit taamatut qilalukkanik pisaqarfigineqartarlutik takuneqartarsimallutik arlarianiik ulluni makkunani aamma taamaakami, Pele Maratsi oqarpoq,
Qilalukkat ikittuinnaat amerlasuutut isikkoqarsinnaasut
Tamannalu uumasulerituunit assortorneqanngilaq.
Pinngortitaleriffimmi immikkoortortaqarfimmi pisortap Fernando Ugartip ilisimavaa, qilalukkat amisut 50-it 100-lluunnit amerlasoorujussuartut isikkoqarsinnaasartut.
Kisianni qangatut amerlatigiunnaarnikuupput.
Ittoqqortoormiini qilalukkat qernertat 2017-imi 570-inik ikinnerupput, 2008-mi 2000-it missaannik amerlatigisimallutik.
Kisianni piniartut allatut isumaqarput. Piniartut biologinit isumasiorneqarsimanngippata kisitsinerit naammanngitsut, taakku oqarput.
Pele Maratse
- Ilisimasaat aallaavigalugit, taakkuusariaqaraluaramik peqataatinneqarlutik akuutinneqarnissaat, Pele Maratsi oqarpoq.
LÆS OGSÅ Naalakkersuisut bøjer sig og hæver narhvalskvoterne
Piniartut qangali oqaatigisarpaat, qilalukkat timmisartumit kisinneqarsinnaanngitsut, soorlu uumassusilerisut taamaaliortartut, takuneqarsinnaasummi kisimik kisinneqartaramik.
Nunami allanngutsaaliukkami qilalugarpassuit
Fernando Ugartep erseqqissaatigaa, qilalugarpassuit timmisartumit takuneqartartut.
- Sumiiffinni qilalugarfiulluartuni kisitsigaangatta qilalugarpassuarnik takusarpugut. Nunami allanngutsaaliukkami qilalukkanik qernertanik kisitsigatta, qilalukkat 5000-inik amerlatigipput, Fernando Ugarte oqarpoq.
Elektronik atorlugu qilalukkat aqqaqqasut isaannarmillu takuneqarsinnaanngitsut kisinneqarsinnaapput.
Pele Maratsip oqaatigaa, uumassusilerisut ukioq manna Tunumiissimanngitsut.
- Piffissami kingullermi Tasiilap avannaatungaani kisitsisoqarsimanngitsoq paasivarput, Pele Maratse oqarpoq.
Tamannalumi ilumoorpoq. Tasiilami, Kangerlussuarmi Ittoqqortoormiinilu 2016-mi kisitsisoqarpoq. Illoqqortoormiinilu 2017-mi kisitsisoqarluni, kingornalu kisitsisoqarsimanani.
- Qilalukkanik kisitsineq 1 million koruunit missaannik akeqarpoq.
- Taamaattumik sumiiffinni tamani ukiut tamaasa kisitsisinnaanngilagut. Ukiut tamangajaasa kisitsisarpugut. Qilalukkat qernertat kisiisa kisinneq ajorpagut, uumasulli tamaasa kisittarpagut, Fernando Ugarte oqarpoq.
Taassuma piviusorsiorsorinngilaa Tasiilami Ittoqqortoormiinilu qilalukkanik qernertanik kingullermik kisitsisimanermit amerleriarsimanissaat.
- Siullermik maannakkut pisarineqartartut eqqarsaatigalugit qilalukkat amerleriarsinnaanngillat.
- Aappaatut qilalukkat sumiiffiminnit allamut nuuttartuunngillat. Aamma tamanna takusinnaavarput, qilalukkani qaammataasiatigut nassitsivinnik ikkussiffigisimasatsinniittuni. Sumiiffimminnut ukiut tamaasa utertuaannarput, taanna oqarpoq.
Ugartep ilanngullugu oqaluttuaraa, qilalukkat sumiiffigisaanni imaq kissarnerulerpat uumaffiginissaalu ajornarnerulerpat avannaarpasinnerusumut nillernerusumullu nuussasut.
