Misissueqqissaartartut pisortaat: Timip ilai nassaarineqartut angumminngaanneerunarput
Politiit qatserisartullu Ilulissani ikuallaaviup eqqaani timip ilai nassaarisaat angumminngaanneerunarput.
Politiit misissueqqissaarnermut immikkoortortaqarfiani pisortaq, Jan Lambertsen nassuiaavoq.
- Eqqakkanik suli misissuileruttorpugut, timillu ilaanik marlunnik nassaartoqarnerata kingorna soorunami misissuivugut. Timip ilai nassaarineqartut angumminngaanneerunarput. Tamanna qulakkeerlugu suli oqaatigineqarsinnaanngilaq, kisianni tamanna ilimagilluinnarparput, Jan Lambertsen oqarpoq.
Timip ilai nassaarineqartut sorliunersut ileqqoreqqorissaarneq pissutigalugu taassuma oqaatigisinnaanngilai.
Innuttaasunit ikioqqusut
Ilulissani ikuallaavimmi inuup timaata ilaanik nassaartoqartoq politiit sapaamiummat nalunaarutigaat. Timillu ilaanik allamik nassaartoqaqqittoq polititit ullumi siusinnerusukkut nalunaarutigaat.
AAMMA ATUARUK Inuup timaata ilaanik Ilulissani nassaartoqaqqittoq
Toqunneqarsimasup kinaanera pillugu politiit annerusumik paasisaqarsimanngitsut, Jan Lambertsen oqarpoq. Taamaammat innuttaasunik suli ikiorneqarusupput.
- Maqaasisaqartoqarneranik suli saaffigineqanngilagut. Arlaannik maqaasisaqartoqarsimassaaq, Jan Lambertsen oqarpoq.
- Taamamamat innuttaasunut kaammattuivugut: Piniariarsimasorisarsi, angalasorisarsi, aallaarsimaarsorisarsi arlaanniissorisarsiluunniit paasiarlugu attavigisiuk, misissueqqissaartut pisortaat itisiliivoq.
Misissuineq annertusineqartoq
Maannakkutut isikkoqartillugu misissueqqissaarnerput annertusivarput, ikuallaaviup eqqaani aammali Ilulissani eqqaanilu politeerpaaloqassaaq.
- Inuit suleqatigilluarsinnaanissaat neriuutigaarput. Arlaat immikkut ittunik takusaqaruni imaluunniit eqqaaveqarfiit nalaanni immikkut ittunik takusaqarsimaguni politiinut attaveqarli, Jan Lambertsen oqarpoq.
AAMMA ATUARUK Ilulissani ikuallaavimmi eqqumiitsorsiaq pillugu politiit: Maanna toqutsisoqarsimanera pillugu paasiniaavugut
Politiit oqarasuaammut 70 14 48-mut attavigineqarsinnaapput.