Inuup timaata ilaanik Ilulissani nassaartoqaqqittoq
Ilulissani politiit eqqakkanik ikuallaaviup eqqaani inuup timaata ilaanik nassaaqqipput.
Taamaalillutik inuup timaata ilai marluk maanna nassaarineqarsimalerlutik.
Timip ilaanik sapaatiummat nassaartoqaqqaarpoq.
Politiit Ilulissani eqqaaveqarfiit eqqaanni nalaanniluunniilluunniit sapaatip akunnerata kingulliup ingerlanerani pasinarsinnassumik suli takunnissimasinnaasussarsiorput. Taamaammat inuit ataasinngornerup septembarip ulluisa 27-ata arfininngornerullu oktobarip ulluisa aappaata akornanni eqqumiiginarsinnaasumik takusaqarsimagunik politiinut oqarasuaammut 70 14 48-mut erngertumik saaffiginnissapput.
Kalaallit Nunaanni Politit tusagassiuutinut nalunaarummi taama paasissutissiipput.
- Illoqarfimmi eqqaavinni nalinginnaasumik takuneqartanngitsumik takusaqarsimasut tusarfigerusunneruagut. Pineqartut tassaasinnaapput inuit sumiiffimmi nalinginnaasumik takussaaneq ajortut, piffissami eqqumiitsumi igitsiartortut imaluunniit biilinik pasinarsinnaasunik ingerlataqartut, misissueqqissaarnermut immikkoortortaqarfiup pisortaa, Jan Lambertsen oqarpoq.
Tigusarinnittoqanngitsoq
Politiit ikuallaaviup nalaa matoqqatippaat matoqqatitsiviusumilu misissueqqissaartoqaleruttorpoq.
Politiit suliamut atatillugu suli pasisaqanngillat, taamaammat tigusarinnittoqarani.
Timip ilaanik siullermik arfininngornermi nalunaaqutaq 20.30 nassaartoqarpoq. Taanna eqqakkat ikuallatassat akornanniittoq ikuallaavimmi sulisumik nassaarineqarpoq.
Tamanna vicepolitiinspektørip, Gideon Quistip assinik takunnissimasup paasissutissiissutigaa. Taannali annikitsortat pillugit oqaaseqarnianngilaq
- Uanga suliaq immikkuullarittutut isigivara, uanga ukiut 20-t politiiutillunga aatsaat taamatut misigisaqarpunga. Tupannarpoq, Gideon Quist KNR-imut oqarpoq.
Toqutsisoqarsimaneratut misissuiffigineqartoq
Politiit suliaq maanna toqutsisoqarsimaneratut suliaraat. Nassaarineqartoq arnaanersoq angutaanersorluunniit politiit naluaat. Pineqartorli meeraanngitsoq, inersimasuunissaalu takuneqarsinnaasoq, vicepolitiinspektøri nassuaavoq.
Toqutsisoqarnera sapaatip akunnerata siuliani pisimasinnaasoq Gideon Quistip nalilerpaat.
Suliaq pissutigalugu politiit Danmarkimit Nuummiillu ikiuiartortoqarnissaanik piumasaqarput. Politiit suliamut atatillugu ikuallaavimmi takussutissanik allanik ujaasinerminni qatserisartunik suleqateqarallassapput.