Ministeriunerup nunatsinniinnermini pilersaarutai
Anorlerpoq, nittaappoq ministeriuneq Mette Frederiksen Kangerlussuarmi kinguaattooqqavoq.
Massakkut Nuummut tikereertussaagaluarpoq, ualisorli timmisartumik suli mittoqanngilaq. Taamaammat pilersaarutit kinguartinneqartariaqarput.
Aqagu naalakkersuisut siulittaasuat, Múte B. Egede (Inuit Ataqatigiit) peqatigalugu tusagassiortunik katersortitsissaaq. Tusagassiortunik katersortitsineq nalunaaqutaq 09:05-imiit 09:25-mut knr.gl-imi, KNR TV-mi KNR radiumilu toqqaannartumik malinnaaffigineqarsinnaavoq.
Meeqqanut misileraataasimasunut utoqqatseqqinneq
Mette Frederiksen meeqqanut 22-nut 1951-imi Danmarkimut misileraataasimasunut aqagu utoqqatsissaaq. Tamanna Nuummi kulturip illorsuani Katuami ulloqeqqaniit marluk tungaanut pissaaq. Meeqqat misileraataasimasunit arfinillit kiserngorunnikut, qimagutereersullu ilaqutaannut utoqqatsissaaq.
Múte B. Egede aamma oqalugiassaaq, 16-illu peerutereersimasut eqqaaniarlugit minutsimillu ataatsimik nipaallisimasoqassalluni. Meeqqanit misileraataasimasunut 22-usunit arfinillit suli uumapput, 80-it missaannik ukiullit.
AAMMA ATUARUK Ministeriuneq Nuummi silarlummat Kangerlussuarmi kinguaattooqqasoq
Aaqqissuussineq knr.gl-imi KNR TV-mi radiukkullu malinnaaffigisinnaavat.
Ministeriuneq naalakkersuisullu siulittaasuat aqagu ualikkut Nuummi GUX-imut pulaassapput, tassani ilinniartut klassit marluk Mette Frederiksenimut Múte B. Egedemullu apersuissapput.
Ministeriunertut nunarput aappassaa tikeraaraa
Ministeriuneq aqagu unnukkut Ilulissanut aallassaaq.
Taanna tunitsivimmut pilaarluni aallartissaaq, taamaalioreeruni Kangiata Illorsuanukassaaq, ilulissallu akornanni umiatsiakkut takornariassalluni, arfinerniit arferngup qeqqata tungaanut Hotel Arcticimi tusagassiortunik katersortitsissaaq.
Ministeriuneq sisamanngornermi ullaap tungaani mittarfissuassamut borgmesteri, Palle Jeremiassen peqatigalugu alakkaassaaq, kingornalu Danmarkimut aallariartussalluni.
Mette Frederiksen ministeriuninngoramili nunatsinnut aappassaa tikeraarpoq. Siullermik ministeriuninngoqqammiinnarluni 2019-imi tikeraaqqaarpoq.
Tikeraanngitsiartoq taamani Amerikami præsidentiusimasup, Donald Trumpip nunarput pisiariumallugu saqqummernikuuvoq. Taamani Mette Frederiksenip tusagassiortut umiarsualivimmi naapippai kinguninngualu angallammik Kapisilinnukarluni. Nunarput tuniniagaanngitsoq Kapisilinniinnermini oqaatigaa. Kalaallit Nunaat danskinit pigineqanngitsoq, Kalaallit Nunaat Kalaallit Nunaajusoq oqaatigalugu.
- Kim Kielsenip suaarutigereerpaa Kalaallit Nunaat nioqqutaanngitsoq taava tassa, oqallinnerluunniit pisariaqanngilaq, taanna taamani oqarpoq.