Minik Høegh-Damimut tunngasoq Nunatta Eqqartuussisuuneqarfiani oktobarimi suliarineqassasoq
Nunatta Eqqartuussisuuneqarfia arlaleriarluni kinguartitsisareerluni Minik Høegh-Damip ikiaroornartut pillugit aamma tillitanik atueqataaneq pillugit pasisaanerata suliarinissaa ullulerpaa.
Suliaq unnerluussisussaatitaasut 2021-mi marsimi suliassanngorteqqippaat, Nunatta Eqqartuussisuuneqarfiata suliaq pilersaarutit malillugit oktobarip aqqaneq aappaani suliarilissavaa.
Nunatta Eqqartuussisuuneqarfiata, Kalaallit Nunaanni Politiit kiisalu suliami illersuisoq, Finn Meinelip, tamanna KNR-imut uppernarsarpaat.
Finn Meinelilli oqarnera naapertorlugu suliap Nunatta Eqqartuussisuuneqarfiani oktobarimi suliarineqarnissaa qularnarpoq.
Tassami suliaq ilumut suliasanngorteqqinneqarsinnaanersoq sulianik eqqartuussivimmi ingerlatsisarnermut tunngatillugu apeqqutaasoq, taanna isumaqarpoq. Taamaammanuna suliaq Nunatta Eqqartuussisuuneqarfiata arlaleriarlugu aamma kinguartikkaa.
- Apeqqut tassaavoq unnerluussisussaatitaasut suliareqqitassanngortitsinermi sulianut tunngatillugu malittarisassat eqquutissimaneraat, taanna KNR-imut oqarpoq.
Malittarisassat sorlerpiaat unnerluussisussaatitaasut unioqqutissimasinnaaneraat Finn Meinelip oqaatigiumanngilaa.
Sulialli Eqqartuussiviit Qullersaannut suliassanngortinniarlugu, taassuma oqaatigerusuppaa.
- Naak suliaq oktobarimut ullulerneqaraluartoq, suliap Eqqartuussiviit Qullersaannut ingerlateqqinneqarnissaata Ingerlatitseqqinnissamik aalajangiisartunit kingornalu Eqqartuussiviit Qullersaannit akuerineqarnissaa, suliamillu ingerlatitseqqinnissamik itigartitsinissaq anguniarparput, taanna oqarpoq.
Ingerlatitseqqinnissamik aalajangiisarftut eqqartuussivinnut attuumassuteqaratik ilaatigut suliat Eqqartuussiviit Qullersaannut ingerlateqqinneqarsinnaanerannik aalajangiisarput.
Suliaq Ingerlatitseqqinnissamik aalajangiisartunut nassiunneqarsimasoq, aalajangiisartullu suliap Nunatta Eqqartuussisuuneqarfiani oktobarimi suliarineqalinnginnerani aalajangerumaartoq neriulluni, Finn Meinel oqaluttuarpoq
Suliaq naatsumik
Minik Høegh-Dam Avannaata Kommuniani attaviitsuulluni politikeriuvoq.
Siumumi siornatigut ilaasortaavoq, suliarli Nunatta Eqqartuussisuuneqarfianut suliareqqitassanngortinneqarmat partiimit 2021-mi anisitaavoq.
Politikerip angerlarsimaffia politiinit 2018-imi aggustimi misissoqqissaarneqarmat suliaq aallartippoq.
Taassuma angerlarsimaffiani aningaasat 154.805 koruunit nassaarineqarput, taakkunannga 151.900 koruunit isarussat puuini nassaarineqarlutik, sinnerilu aningaasivianiillutik. Aningaasat hashimik nioqquteqarnermeersinnaasut imaluunniit unioqqutitsisumik iliuuseqarnermeersinnaasut politiit isumaqarput.
Suliarli Eqqartuussisoqarfik Sermersuumi 2021-mi marsip 25-ani suliarineqarmat taanna pinngitsuutinneqarpoq. Unnerluussisussaatitaasullu eqqartuussut suliarineqaqqittussanngortippaat, taamaammallu suliaq Nunatta Eqqartuussisuuneqarfiani aalajangiiffigineqartussanngorluni.