Minik Høegh-Dam hashimut tunngatillugu suliaq allallu pissutigalugit Siumumit anisinneqartoq
![](/sites/default/files/styles/image_934x467/public/img_6659.jpg?itok=gZaBHczY)
Minik Høegh-Dam Avannaata Kommuniani borgmesterinngortussaagaluarneranit sapaatip akunnera qaangiutinngitsoq partiiminit Siumumit aamma anisitaavoq.
Partiip eqqartuussisutut iliuuseqarnissaq pisussaaffiginngikkaa partiip siulersuisuisa maannamut attassimagaluarpaa. Politikerimulli akerleriissutaasumut tunngatillugu pissutsit pasinartut qassiiusut partiip siulersuisuunerisa ilisimalerneratigut tamanna allanngorpoq.
Erik Jensen tusagassiuutinut nalunaarummi KNR-imut nassiunneqartumi allappoq.
- Siumut maanna killiffimmi anisitsiniarlutik inerniliinerat peqquteqarpoq siammarterisimanermut pasilliisoqarneranut ilisimasat saniatigut Siumup isiginngittusaarsinnaanngisaannik tunngavissalinnik assingusunik pasilliutinik peqarmat. Siumut ikiaroornartumut aanngajaarniutinillu siammarterilluni inatsisinik unioqqutitsinermut akuersaanngilluinnarpoq, partiip siulittaasua allappoq.
AAMMA ATUARUK Minik Høegh-Dam hashimut tunngatillugu suliamut oqaaseqarnianngitsoq
Taassumali suliamut atatillugu suut nutaat pineqarnersut erseqqissaatiginngilai.
Nunatta eqqartuussivianiissasoq
Minik Høegh-Dam 300 gram ataallugu oqimaassuseqartumik hashimik tuniniaanikkut ikiaroornartut pillugit inatsimmik unioqqutitsisimasutut unnerluutigineqarnikuusimasoq KNR-ip ataasinngornermi saqqummiuppaa. Suliaq taanna Eqqartuussisuuneqarfik Sermersuumi marsip ulluisa 25-anni tassa qineqqusaartoqarnerata nalaani pinngitsuutitsinermik inerneqaraluartoq suli Nunatta Eqqartuussisuuneqarfianut suliareqqitassanngortinneqarpoq.
Politiit Minik Høegh-Damip inaani uppernarsaatissanik aggustip 24-anni 2018-imi ujaasineranni aningaasat 154.805 koruunit nalingi nassaarineqarput. Aningaasallu taakku politiit hashimik tuniniaanermiinngikkunik allamik unioqqutitsisumik iliornermeersuusoraat.
Politikeri suliamut atatillugu KNR-imit apersorneqarusunngilaq.