Minik Høegh-Dam Eqqartuussisoqarfik Sermersuumi suliami pinngitsuutinneqarpoq, unnerluussisussaatitaasulli suliaq Nunatta Eqqartuussivianut suliareqqitassanngortippaat.Assi: Jonas Fievé/KNR

Minik Høegh-Dam hashimut tunngatillugu suliamut oqaaseqarnianngitsoq

Avannaata Kommuniani borgmesterinngortussaagaluartoq hashimik tuniniaasimasinnaanermut atatillugu eqqartuussivimmi suliassamut tunngatillugu apersorneqarusunngilaq. Tassungali taarsiullugu videoliamik Facebookikkut siammarterivoq, isornartorsiuinermillu oqaaseqarnerit piiarneqarlutik.

Minik Høegh-Dam Siumumeersoq Avannaata Kommuniani borgmesterinngortussatut aalajangersimasoq ikiaroornartut pillugit inatsisinik unioqqutitsisimasutut unnerluutigineqarpoq.

Politiit Minik Høegh-Damip inaani aggustip 24-anni 2018-imi uppernarsaatissanik ujaasineranni aningaasat 154.805 koruunit nalingi nassaarnerata kingunerisaanik tamanna pivoq.

Taanna Eqqartuussisoqarfik Sermersuumi suliami pinngitsuutinneqarpoq, unnerluussisussaatitaasulli suliaq Nunatta Eqqartuussivianut maanna suliareqqitassanngortippaat.

AAMMA ATUARUK Borgmesterinngulersoq hashilerisutut pasineqarluni Nunatta Eqqartuussiviani suliassaasoq

- Ingerlatitseqqiivugut isumaqaratta suliaq Nunatta eqqartuussiviani aalajangerneqartariaqartoq. Maannalu taamaaliorpugut, pisumullu atatillugu oqaaseqaqqissinnaanngilanga, unnerluussisuuneq Morten Nielsen KNR-imut oqarpoq.

Taamaammat tusarliupparput

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Minik Høegh-Dam Avannaata Kommuniani borgmesteriulissaaq. Taamaammat suliaq borgmesterinngorlaamut tunngasoq tamanut saqqummiuttariaqarluinnartoq, KNR isumaqarpoq. 

Minik Høegh-Dam Eqqartuussisoqarfik Sermersuumi unnerluunneqarnermini pinngitsuutinneqarsimasoq tusagassiuinermi ileqqussat naapertorlugit tusarliutinngilarput.

Unnerluussisussaatitaasulli suliaq taanna Nunatta Eqqartuussivianut suliassanngorteqqippaat – Minik Høegh-Damilu borgmesteriulissalluni. 

Taamaammat tamanna tamanut saqqummiunneqartariaqartoq, KNR isumaqarpoq. 

KNR-ip Siumumit politikeri sapaatiummalli oqaaseqartinniarsarigaluarpaa. Sianernerilli, sms-it Facebookikkullu allakkat qassiiusut kingunerisaanik Minik Høegh-Damip apersorniarnera iluatsinngilaq.

KNR-ip taassuma Nunatta Eqqartuussiviani suliarineqartussami eqqartuussissuserisua, nunatta illersuisuunera, Finn Meinel aqqutigalugu aamma attaveqarfigigaluarpaa.

Marlunngornermi ullup qeqqata missaani KNR-imut mailikkut allagaqarpoq. Mailimi tassani eqqartuussivimmi suliami pinngitsuutinneqarsimalluni allappaa. Taamaammallu KNR-ip suliaq pillugu allaaserisaqarnerani eqqortumik iliuuseqarfigineqarsimanani isumaqarpoq.

Facebookikkut attaveqartoq

Tassunga taarsiullugu Minik Høegh-Dam videoliamik Facebookikkut tamanut ammasumik quppernermini ataasinngornermi unnukkut ikkussivoq.

Videoliami tassani suliat allat marluk ingerlanikuusimasut taakkunanilu aamma pinngitsuutinneqarsimalluni oqarpoq. Nunatta Eqqartuussiviani suliarineqartussami sulili ullulerneqanngitsumi aamma pinngitsuutinneqarnissani taassuma naatsorsuutigaa.

Suliaq Nunatta Eqqartuussiviani qaqugu suliarineqassanersoq suli ullulerneqanngilaq.

Minik Høegh-Damip KNR-imit attaviginiarneqarsimagaluarnini videoliami eqqaanngilaa.

Borgmesterinngunngiinnassasoq

Minik Høegh-Damip Avannaata Kommuniani borgmesterinngornissaminik qulakkeerissutaasumik Naleraq arfininngormat isumaqatigiissuteqarfigaa.

Kommunimili Siumut gruppiata tassunga tapersersuinini ullumi tunuartikkaa, Siumup siulersuisuunerani ilaasortap, Bernhard Olsenip paasissutissiissutigaa.

Aningaasat, Minik Høegh-Damip angerlarsimaffimminiitsissimasai pissutaapput – taamaalillunilu Avannaata Kommuniani borgmesterinngussanani.

AAMMA ATUARUK Efter borgmestersag: Minik Høegh-Dam har ikke længere opbakning i Avannaata

Borgmesteritut atuuffik arfininngormat qulakkeeramiuk oqaatsit angisuut atorpai: Suleqatigiinneq kommunimilu ataatsimoorneq pingaaruteqartoq taassuma paasissutissiissutigaa. Tamanna partiinut allanut suleqatigisassarinngisaanut aamma tunngavoq.

Eqqartuussivimmili siarineqartussaq pillugu videoliaani Facebookikkut siammarterneqartumut oqaaseqarnerit isornartorsiuisut inissaqartinneqanngillat.

Isornartorsiuinermik oqaaseqarnerit tassani nunguterneqartarput, taamaalillutik oqaaseqarnerit kaammattuisut pitsaasullu kiserngorutsinneqarlutik.

KNR-ip isornartorsiuinermik oqaaseqartut sukkasuumik peerneqapallassimasut assilineqarneri paarivai.

Minik Høegh-Dam ima apeqquteqarfigerusukkaluarparput: 

Eqqartuussivimmi suliamik taama ilungersunartigisumik ingerlasoqarnikuusimappat sooruna kommunimut qinersinissamut sassarpit?

154.805 koruunit suminngaanneerpat?

Sooruna aningaasanik taama amerlatigisunik isarussat puuanniittuuteqarpit?

Sooruna apersorneqarusunnak Facebookikkut nammineq quppernerit aqqutigalugu attaveqarnissat aalajangerpiuk?

Sooruna videoliarni isornartorsiuisumik oqaaseqarnerit nunguterneqarnissaat tapersersuinermillu oqaaseqarnerit ataannarnissaat aalajangerpiuk?

Borgmesterinngortussaajunnaarpasinnerit qanoq igiviuk?

Oqaaseqarnerit Minik Høegh-Dam-ip Facebookkimi qupperneranit peerneqarnikut assilineqarneri uani takusinnaavatit:

 

Isummersuutit