Borgmesterimut suliap kingorna: Minik Høegh-Dam Avannaata Kommuniani tapersersorneqarunnaartoq

Siumutgruppiata Minik Høegh-Dam Avannaata Kommuniani borgmestereriniarunnaarpaa.
Minik Høegh-Dam aamma Naleqqamit Anthon Frederiksen Avannaata Kommuniani Naleqqap Siumullu suleqatigiinnissaanik isumaqatigiissut nutaaq arfininngormat isumaqatigiissutigaat. Assi © : Avannaata Kommunia.
Allattoq Christine Hyldal
apriilip 13-at 2021 12:34

Minik Høegh-Dam Avannaata Kommuniani Siumutgruppianit tapersersorneqarunnaarpoq.

Minik Høegh-Dam taamaalilluni borgmesterinngornissaminut tapersernersorneqarunnaarpoq.

Sermitsiaq.ag taama allaaserisaqarpoq.

Taamaammat tusarliupparput

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Minik Høegh-Dam Avannaata Kommuniani borgmesteriulissaaq. Taamaammat suliaq borgmesterinngorlaamut tunngasoq tamanut saqqummiuttariaqarluinnartoq, KNR isumaqarpoq. 

Minik Høegh-Dam Eqqartuussisoqarfik Sermersuumi unnerluunneqarnermini pinngitsuutinneqarsimasoq tusagassiuinermi ileqqussat naapertorlugit tusarliutinngilarput.

Unnerluussisussaatitaasulli suliaq taanna Nunatta Eqqartuussivianut suliassanngorteqqippaat – Minik Høegh-Damilu borgmesteriulissalluni. 

Taamaammat tamanna tamanut saqqummiunneqartariaqartoq, KNR isumaqarpoq. 

- Siumutgruppiata Minik Høegh-Dam Avannaata Kommuniani borgmesterinngortussatut tapersersorsinnaajunnaarpaa, Bernhardt Olsen Sermitsiaq.AG-mut oqarpoq.

Berhardt Olsen Siumut siulersuisuuneraneersuuvoq, KNR-illu ippassaq saqqummersitaata kingunerisaanik akerliliisumik nalunaaruteqartoqarpoq:

AAMMA ATUARUK Borgmesterinngulersoq hashilerisutut pasineqarluni Nunatta Eqqartuussiviani suliassaasoq

Minik Høegh-Damimi ikiaroornartut pillugit inatsisinik unioqqutitsisimasutut Eqqartuussisuuneqarfik Sermersuumi marsip ulluisa 25-at 2021-mi unnerluutigineqarpoq.

Politiit Minik Høegh-Damip inaani aggustip 24-anni 2018-imi uppernarsaatissanik ujaasineranni aningaasat 154.805 koruunit nalingi nassaarineqarput.

Taakkunannga 151.900 koruunit qilertanngortinneqarsimasut isarussat puuiniittut nassaaraat, 2.905 koruunillu aningaasiviani nassaaralugit.

Politiit isumaqarput aningaasat taakku, hashimik 300 grammimit minnerunngitsumit tuniniaanikkut, allatulluunniit inatsisinik unioqqutitsinikkut pissarsiarneqarsimasut. Tamanna allakkami unnerluutiginnissummi allassimavoq.

AAMMA ATUARUK Siumut borgmesterinngulersoq pillugu: Suliat inunnut ataasiakkaanut tunngasut oqaaseqarfigineq ajorpagut

Minik Høegh-Dam eqqartuussivimmi suliami pinngitsuutinneqarpoq, unnerluussisussaatitaasulli suliaq nunatta eqqartuussisuuneqarfianut suliareqqitassanngortippaa.

- Ingerlatitseqqiivugut isumaqaratta suliaq Nunatta eqqartuussiviani aalajangerneqartariaqartoq. Maannalu taamaaliorpugut, pisumullu atatillugu oqaaseqaqqissinnaanngilanga, unnerluussisuuneq Morten Nielsen KNR-imut oqarpoq.

Minik Høegh-Damillu Avannaata Kommuniani Siumumit tapersersorneqarunnaarneranut tamanna pissutaavoq.

- Paasissutissat nutaat tusagassiuutit aqqutigalugit ilisimalikkagut tunngaviupput. Paasissutissat taakku pissutsinut soorunami allanngortitsipput, Bernhardt Olsen sermitsiaq.ag-mut oqarpoq.