Minik Høegh-Damimut tunngatillugu nunatta eqqartuussisuuneqarfiani suliaq kinguartinneqartoq

Avannaata Kommuniani kommunalbestyrelsimut ilaasortaq, Minik Høegh-Dam nunatta eqqartuussisuuneqarfiani unnerluussaasut issiavianni ullumi issiasussaagaluarpoq. Suliamili nutaanik paasissutissaqalernera pissutigalugu suliaq juunip ulluisa 23-annut kingunartinneqarpoq.

Allattoq Mathilde Justesen Ranners

maajip 26-at 2023 13:59

Minik Høegh-Dam naammagittartariaqarpoq, suliarmi tassunga attuumassuteqartoq ikiaroornartunullu tillitanillu pisinermut tunngassuteqartoq nunatta eqqartuussisuuneqarfiani kinguartinneqarpoq.

Kalaallit Nunaanni Politiini unnerluussisussaatitaasuuneq, Martin Standby Nielsen KNR-imut paasissutissiivoq.

Aamma atuarukMinik Høegh-Dam hashimut tunngatillugu suliaq allallu pissutigalugit Siumumit anisinneqartoq

Unnerluutigineqartumut illersuisup suliami paasissutissat nutaat ullumi saqqummiummagit suliaq juunip 23-anut kinguartinneqartoq taassuma oqaatigaa.

Martin Standby Nielsenip suliamut paasissutissat nutaat KNR-imit attaveqarfigineqanngitsiarluni pissarsiarigamigit suliap kinguartinneqarneranut pissutaasoq annerusumik oqaaseqarfigisinnaanngilaa.

TAAMAAMMAT ILANNGUTASSIARAARPUT

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Taanna Avannaata Kommuniani borgmesterinngortussaanikuugaluarpoq, taamaammat suliap tamanut saqqummiunneqarnissaa soqutiginaateqartoq KNR-ip nalilerpaa.

Tusagassiuinermi ileqqussat naapertorlugit Minik Høegh-Dam unnerluutigineqarnera eqqartuussivimmilu pinngitsuutinneqarnera saqqummiunneqanngilaq.

Unnerluussisussaatitaasulli suliaq nunatta eqqartuussisuuneqarfianut suliassanngorteqqimmagu suliap eqqaaneqarnissaa tamanut soqutiginaateqartoq KNR-ip nalilerpaa.

Allisiguk

Minik Høegh-Dam Avannaata Kommuniani qinikkatut attaviitsunut sulivoq.

Taanna Siumumi ilaasortaagaluarpoq, sulialli nunatta eqqartuussisuuneqarfianut suliassanngortinneqarnera pissutigalugu partiimit 2021-mi anisinneqarpoq.

Suliaq naatsumik

Qinikkap angerlarsimaffia politiinit 2018-imi aggustimi misissoqqissaarneqarmat suliaq aallartippoq.

Taassuma angerlarsimaffiani aningaasat 154.805 koruunit nassaarineqarput, taakkunannga 151.900 koruunit isarussat puuini nassaarineqarput, sinnerilu aningaasivianiillutik. Aningaasat hashimik nioqquteqarnermeersinnaasut imaluunniit unioqqutitsisumik iliuuseqarnermeersinnaasut politiit isumaqarput.

Suliarli Eqqartuussisoqarfik Sermersuumi 2021-mi marsip 25-ani suliarineqarmat taanna pinngitsuutinneqarpoq. Unnerluussisussaatitaasullu eqqartuussut suliarineqaqqittussanngortippaa, taamaammat suliaq nunatta eqqartuussisuuneqarfiani ullumi aalajangiiffigineqartussaagaluarpoq.

Nutaarsiassami kukkunermik nassaarsimaguit uunga allaffigineqarsinnaavugut.