ICC-mi inerniliineq: Mingutitsineq, umiarsuit angallannerat aamma paasissutissat eqqunngitsut ajornartorsiutaapput

Piniarnerup isumannaatsumillu inuussutissaqarnerup ICC-mit qanoq pitsanngorsarneqarsinnaanera eqqartorneqarmat, ajornartorsiuterpassuit eqqaaneqarput. Nunatta, Alaskap Canadallu ilaasortaatitaasa misilittagai pingasut eqqartuinermi annermik uteqqiapput. 

Tamanna pivoq ICC-ip ilaasortaatitai nunatsinneersut, Alaskameersut Canadameersut Chukotkameersullu (Ruslandimeersut) aallartitaat Ilulissani ataatsimeersuarmata. 

KNAPK-ip siuliuttaasua Nikkulaat Jeremiassen pingasunngornermi ataatsimiinnermi peqataasoq oqarpoq, nunatsinni pinngortitamik mingutitsineq piniartunut ajornartorsiutaanerpaasoq. 

- Aarlerinartutut isiginvara nammineq mingutitsinerput, eqqaaveqarnikkut aammalu immamut kuutitsinerput, umiarsuillu sikuunikilliartorneranik ingerlaartut aarlerinartut, taakkuupput piniakkanik ulorianartorsiortitsisinnaasut. 

Nikkulaat Jeremiassen KNR-imut oqarpoq. 

Sikuunikilliartorneranillu ajornartorsiuteqarneq Canadameersup Adamie Deliske Alakup ilisarisinnaavaa. 

Adamie Delisle Alaku isumaqarpoq paasisanik eqqunngitsunik paasissutissiineq Canadami inunnut aarlerinartumik siooranartoq. - Nunarsuarmiut isumaqarput nannut Canadami nunap immikkoortuani aggerfinni nungulersut, kisianni akerlianik pisoqarpoq taanna oqarpoq.  Assi © : KNR/Arnaq Nielsen

Taanna ICC Canadami ilaasortaavoq, inuillu suliniaqatigiiffianni Makivik Corporationimi siulittaasup tulleraa, pinngortitaq pisuussutillu pillugit immikkoortortaqarfimmeersoq. 

- Issittumi inuit ajornartorsiutaasa assingi nalaattarpavut. Silap pissusiata allangoriartornera pineqarpat imaluunnit uumasut allameersut amerliartornerat pineqarpat, ajornartorsiutivut assigiipput. Sikuunikilliartorneranik ajornartorsiut tusartuartarpara, sikulu angallannermut piniarnermut aalisarnermullu pingaaruteqaqaat. taanna oqarpoq. 

Umiarsuit mingutitsisut

Oqallinnermi pingasunngornermi ingerlanneqartumi imaatigut angallanneq sammineqangaatsiarpoq. Umiarsuit takornariutit assartuutillu amerliartornerat eqqartorneqarluini.

- Umiarsuit takornariartaatit annertusigaluttuinnartut aqullugit killiliiffiginngikkutsigit aamma taakkua annertoorujussuarmik mingutitsipput. 

Nikkulaat Jeremiassen oqarpoq. 

Umiarsuit angallattut amerliartornerisa kingunerinik ajornartorsiutit, ICC Alaskameersup Crawford Patkutap ilisiarisinnaalluarpai. 

Taanna Alaskap avannarpasissuaneersuuvoq, nunap immikkoortuani North Slope Boroughimi siulersuisunut ilaasortaalluni. Tamatuma saniatigut Arctic Slope Regional Corporationimi siulittaasuuvoq. 

- Alaskap Ruslandillu akornanni umiarsuarnik assartuineq annertusivoq, nakkutigineqartariaqarpoq. Umiarsuit arfernik uumasunillu imarmiunik aporsisarput, taanna oqarpoq nangillunilu: 

- Uumasut imarmiut tusindillit umiarsuarnit assartuutinit aporneqarlutik toqusarput. Qassutaarsiutit aamma ajornartorsiutaaqaat, imarmiummi napitittarput.

Piniagassat ajoquserneqarneranik ajornartorsiut Nikkulaat Jeremiassenip ilisarisinnaavaa. 

- Inatsisiliornikkut, nunat tamat ingerlaaqatigiiffiisigut oqartussaaqatigiinneq IMO eqqarsaatigalugu, taavalu sukkut piniakkat innarlernagit suleqatigiinnikkut ammasumik anigorneqarsinnaapput.

Inuit ilisimasaat atuuttussaapput

Piniarneq isumannaatsumillu inuussutissaqarniarnerup eqqartornerani, nunat ilaasortat assigiimmik ajornartorsiutaasa pingajuat tassaavoq inuit ilisimasaasa tatigineqannginnerat.

- Piniartut ilisimasaasa ilisimatuut ilisimasaattulli atuussinnaanerat qulakkiissavarput, ataatsmiinnermi Nikkulaat Jeremiassen oqarpoq. 

Naalliunnartualu Adamie Delisle Alakup ilisarisinnaalluarpaa. 

- Paasisat eqqortuunissaat pingaaruteqarpoq, taamaammallu misissuinerit sorliit pingaarnersiorneqassanersut inunnit aalajangeeqataaffigineqartariaqarpoq, taanna oqarpoq. 

Taanna isumaqarpoq paasisanik eqqunngitsunik paasissutissiineq Canadami inunnut aarlerinartumik siooranartoq. 

- Nunarsuarmiut isumaqarput nannut Canadami nunap immikkoortuani aggerfinni nungulersut, kisianni akerlianik pisoqarpoq taanna oqarpoq. 

Piniarnermi piniakkanillu nakkutillinermi inuit peqataatinneqarnissaat anguniarlugu, ajornartorsiullu aaqqinniarlugu isumaqatigiissusiornermik taanna suliaqarpoq. Taamaakkaluartorlu isumaqatigiissutit ataqqineqartannginnerat misigisarpaa, illisimatuullu ilisimasaat inuit ilisimasaannit pingaartinneqarnerusartoq misigisarpaa. 

- Najukkatsinni ukioq kaajallallugu susoqartoq nalunngilarput, pinngortitami susoqartoq nalunngilarput. Adamie Delisle Alaku oqarpoq. 

Piniarnerup isumannaatsumillu inuussutissaqarnerup eqqartorneqarnerata saniatigut, imartat pillugit aqutsineq aamma nunat inoqqaavisa oqaasii pillugit ICC-mi oqallittoqarpoq. 

2026-mi ICC ataatsimeersuaqqissaaq.