Mike Keenip angalaffigisani ingerlateqqileraa

Qajaq, kalaalimerngit imaannarsuarlu. Tuluit Nunaanneersup igasup, Mike Keenip ulluni 76-ini Qaqortumiit Upernaviliarluni qajartornerani pissutsit taakkuupput. Angallaffigisaa 2.200 kilometerinik isorartussuseqarpoq.

Taanna Qaanaap tungaanut qajartortussaagaluarpoq, imaatali sikoqarnera pissutigalugu anguniakkani unitsippaa.

Angalaffigisanili naammassiniarlugu maanna uteqqippoq. Taanna Upernavimmit 850 kilometerinik isornartussuseqartussuseqartukkut qajarluni Qaanaaliarniarluni tallimanngormat aallarpoq.

Siorna angusaaniit ajornaannerussasoq eqqarsartoqarsinnaavoq, kisianni tamanna sikoqarnera, silap qanoq innera qanorlu avinngarusimatiginera pissutigalugu angalanerani ajornakusoornerpaavoq.

- Nunaqarfinni periarfissaqaruma unnuerusuttarsinnaavunga tupertornermiit nuannernerussammat.

- Misilikkumaarpara, aqqutaanili nunaqarfiit tamakkersinnaanngilakka piffissaasuanera peqqutigalugu, Mike Keen ullormut 50 kilometerinik qajartortarnissaminik naatsorsuuteqartoq oqarpoq.

Imaatigut allakkisartoq

Upernavimmiit avannamukarnermini nunaqarfiit arfineq-pingasut aqqusaassavai, Kullorsuarlu kingulliullugu aqqusaassallugu. Qimusseriarsuakkuulerunilu inoqarfinnik aqqusaagassaqaqqissanngilaq.

- Qimusseriarsuup ikaarnissaa 300 kilometerersuuvoq. Nunamut niuallaartassanngilanga nanoqarnissaami aarlerinaqaaq. Taamaammat tuperiartortassanngilanga.

Taassuma siorna angalanermini kalaalimerngit inuussutigai, maannalu aamma taama ilioqqinniarpoq.

- Assigiinngitsorpassuarnik taquarpunga, niisamineq, nikkut, assagiarsuit, aalisakkallu panertorpassuit. Nerisassat pitsassuit taquarissamaarpakka, Mike Keen oqarpoq.

Taassuma allakkat pingasut Qaqortumi Arsummilu innuttaasunit Qaanaamukaannissai neriorsuutigai, anguniakkanilu taanna angungajalerpaa.

Mike Keenip Qaanaamut aggustip 25-ani tikinnissani naatsorsuutigaa, taassuma angalanera uani malinnaaffigisinnaavat.