Mike Keen kitaata sineriaani qajartornikuuvoq. Maanna Tasiilami puisip aava mikiarsiaq misilittarpaa

Ukiup ataatsip missaata matuma siorna Qaqortumiit Upernavimmut qajartorpoq. Mike Keen nunatsinnut maanna uteqqippoq.

Tamatumuunali Tasiilamut angalavoq.

Matumuuna qajarianngilanga, tassami aamma manna sikuuvoq. Hoteliaqqami The Red Housemi Tasiilami igasuuvunga, Tuluit Nunaanneersoq igasoq oqarpoq.

Taanna maanna sapaatit akunneri arfineq-pingasut Tasiilameerpoq, sapaatillu akunneri marluk qaangiuppata Londoniliaqqissalluni.

Nunatsinni pissarititaasunik tamanik misileraarusulluni uteqqinnissaminut periarfissarsiorsimanerminut tunngavilersuutigaa.

Siornami nunatta pissarititaannaanik inuussuteqarluni ulluni 76-ini qajartoriarpoq. Maanna qajarianngikkaluarluni kalaalimiinnarnik nerisaqarpoq.

- Siorna Qaqortumiit Qaanaamut qajartoriarninni nerisakka nerisareqqilerpakka. Angalagama iluarusunnikooqaanga.

Sapaatinilu arfineq-pingasuni assinganik nerisaqarnermini sunniutai takusinnaavai.

- Naak timikkut assorunngikkaluarlunga 12 kiilunik oqilereersimalerpunga. Ajunngitsorujussuuvunga, nukissaqarluarpunga sinilluartarlungalu, Mike Keen oqarpoq.

Puisimi nerineqarsinnaasut tamakkerlugit misilikkai

Mike Keenip kalaalimerngit pinngitsoorsinnaajunnaarsimallugit oqaatigaa. Maanna nunatsinniinnermini kalaalimerngit kitaani nerisassaasunit allanerulaartut misilittarpai.

- Puisi tamakkerunarpara, puisip aava mikiarsiaq tusarakku misilittariaqarlugu eqqarsarpunga, Mike Keen oqarpoq, nangillunilu:

- Kiviatut ippoq, sakkortoorujussuuvoq. Mamaraarali. 

Mike Keenip Tasiilamiinnermini ajunngitsuliorfigineqartarnini qujamasuutigaa.

- Maani piniartut ajunngitsorsuarmik pivaannga. Nerisassanik soqutigisaqartunga paasigamikku oqartarput; qaallutit uku misilissavatit, uku misilissavatit, uku takussavatit. Puisinniartunut ippassaanikkunni peqataavunga. Pikkunaqaaq, misigisaq nuanneqaaq, taanna oqarpoq.

Mike Keen siorna qajartornermini anaminik Pinngortitaleriffimmut misissugassanik nassiussisarpoq. Misissuinerulli inerneri aapaagu aatsaat pissarsiarisissaagai, Ilisimatusarfimmit, Aviaaja Lyberth Hauptmann oqarpoq.

Mike Keenilli qajartornini suli naammassilluanngilaa. Qaqortumit siorna apriilimi aapparpoq, ullullu 100-it qajartoreeruni Qaanaamut apuunnissani pilersaarutigigaluarpaa, Upernavimmulli killiinnarpoq.

Taamaammat Qaanaap tungaanut qajartorfissani kingulleq aggustimi qajartorfigiartussavaa.