Angalanermini Upernavimmut killiinnartoq: 2.200 kilometerinik isorartugisumi ulluni 76-ini qajariartoq

Mike Keen killisimaakkajuttuunngilaq. 

Upernavimmulli tikikikkiartorami qullilinngitsoorsinnaasimanngilaq. 

Taassuma 3.000 kilometerinik isorartutigisumi, tassa Qaqortumiit Qaanaamut, qajariarnissi anguniarsimagaluarpaa, angallavimminili sikuusarmat uniinnartariaqarsimalluni. 

- Akissaarullungalu piffissaaruppunga – piniinnaraluarumali aatsaat juullimi apuussimassagaluarpunga.

- Sivitsorortoorpallaassaqaanga. Ullunili 76-ini 2.200 kilometerinik isorartutigisumik angalasinnaagama nuannaaqaanga. Ajunngeqaaq, Mike Keen oqarpoq.

Angalanermini kalaalimiinnarnik nerisaqarnini timiminut qanoq sunniuteqarluartiginera tupinnaqisoq, taanna oqarpoq. 

- Aatsaat taama peqqitsigalunga misigaanga. Nerisakka pitsaaqaat. Soorlu tassa 18-inik ukioqartunga, 54-ileeqqammertoq Mike Keen oqarpoq.

Nuannisaannaavittoq

Ullormut akunnerit arfinillit arfineq-pingasullu akornanni qajariartarsimagaluarluni nukissaaruttarsimanani, ullormut 30 kilometerinik ingerlaartarnissamik siunniussaqarsimasoq Mike Keen oqarpoq. 

- Ullormut 40-50 kilometerit missaanni ingerlaartarpunga. Kalaaliminertortarsimanngikkaluaruma taamaaliorsimasinnaanavianngikkaluarpunga.

Tamatumalu siunersinissaa angalanermini anguniagaanut ilaavoq.

Aamma puisit qanoq plastikkeeraqartiginersut anaasigut paasiniartarpai. Londonimullu ataasinngorpat tikereeruni misissugassanik katersisimavoq. 

Mike Keen ulluni 100-ni nunatsinniitilluni ulluni 76-ini qajariarluni angalavoq. 

- Ajunngeqaanga. Angerlaruma meeqqama takunissaannut qilanaarpunga, Kalaallit Nunaalli maqaasissamaalereerpara, taanna oqarpoq nangillunilu:

- Nuannisaannaavippunga, aamma artorsarfinni. Misigisaq nuannerluinnarpoq.