Mette Frederiksen kalaallit meeqqat inissinneqarsimasut pillugit: Oqartussanut tatiginnippunga

Aki-Matilda Høegh-Dam aamma Aaja Chemnitzip Folketingimi apeqquteqarsinnaanertik inissiisoqarneranut suliarpassuit pillugit oqaluuserinnitsitsipput.

Allattoq Ann-Sophie Greve Møller

novembarip 29-at 2024 10:55

Nutserisoq Connie Fontain

Sapaatini akunnerni kingullerni – imaluunnit ukiuni kingullerni tusarneqartuarpoq: danskit kommuniisa angajoqqaanut misissuutit kalaallinut ilaqutariinnut inissiinermut tunngatillugu atorunnaartariaqarpaat.

Aaja Chemnitz (IA) aamma Aki-Matilda Høegh-Dam (Siumut) tamarmik Folketingimi ilaasortaasut taama aamma oqariartuuteqarput. Taamaammat inissiinerit ministeriunermut Mette Frederiksenimut (S) Folketingimi marlunngornermi apeqquteqarnissamut periarfissaqarnermi aamma oqaluuserineqarput.

Aki-Matilda Høegh-Dam ataatsimiittarfimmi ministeriunermut apeqquteqarluni aallartippoq, taassuma ministeriunerup angajoqqaanut misissuutit kalaallit meerartaannik inissiinermi suliani suli atorneqartarnerat qanoq isumaqarfigineraa apeqqutigaa.

- Taakku (inissiinerit aaqq.) paasissutissiissutigineqartumik suliatigullu tunngavilersugaalluartumik suliarineqartuaannassapput. Danmarkimi inuiaat meerarineraat imaluunniit nunanit allanit kulturiniillu allanit Danmarkimukartut meerarineraat apeqqutaatinneqarani.

- Oqartussat suliassaminnik nakkutiginninnerat tunngaviusumik tatigaara. Naalagaaffeqatigiiffigisatsinni nunat killeqarfii akimorlugit nuuffigisinnaasatsinni meeqqanut ilaqutariinnullu tunngatillugu sulianik isumaginninnerit arlaat immikkut marluginiassaneripput qularnanngilaq, Mette Frederiksen oqarpoq.

Meeqqamik illersuiniarluni ilaatigut tuaviorpallaartoqartartoq

Siumumit politikerip danskit naalakkersuisuisa kalaallit meerartaat ilaqutariinnut kalaallisut kultureqartunut inissinneqarnissaanut periarfissat ammaakkusunneraat paaserusuppaa.

Ministeriunerullu isumassarsiaq taanna ammafigineruaa.

- Tamanna isumaqarpunga eqqarsaatigineqaqqissasoq, Mette Frederiksen oqarpoq.

ANGAJOQQAAT KALAALLIT MEERARTAASA ALLAMUT INISSINNEQARATARSINNAANERANNIK DANMARKIMI KOMMUNIT NALILEERIAASIISA ISORNARTORSIORNEQARNERAT NAATSUMIK

Ilaqutariit kalaallit Danmarkimiittut meerartaat allamut inissitat ilaqutariit qallunaat meerartaasa allamut inissitaasut tallimariaatigaat, VIVE (Det Nationale Forsknings- og Analysecenter for Velfærd i Danmark) nalunaarusiamini 2022-meersumi allappoq.
Danmarkimi kommunit isumaginnittoqarfiini kalaallit meerartaasa allammut inissinneqaratarsinnaanerannik suliat kalaallit kulturiannik oqaasiinillu eqqarsaatiginninnani suliaasut taamaannerallu kalaallit angjoqqaat paatsoorneqarnerannik taakkualu pigiliutiinnakkanik isumaqarfigineqarnerannik kinguneqarsinnaasut, VIVE-p nalunaarusiamini 2023-meersumi allappoq.
Kalaallit angajoqqaat meeraasa allamut inissinneqaratarsinnaanerannik Danmarkimi kommunit angajoqqaat piginnaasaannik nalileeriaasii (FKU) aamma isornartorsiorneqarput. Nalileeriaatsit taakkua nunani killerneersut kulturiannut ileqquinullu naleqqussaagaanerat isornartorsiorneqarnerinut tunngavilersuutigineqarpoq.
Naalagaaffik ukiuni pingasuni agguarlugit atugassatut 7,8 millionit koruuninik Danmarkimi kalaallit meerartaannik allamut inissiinissamik naliliiniarnermi angajoqqaat kulturiat oqaasiilu eqqarsaatigalugit apersorneqartarnissaannut taamaaliornermullu nutaanik najoqqutassiornissamut illikartitsivoq.
Nalilersueriaatsinik nutaanik ineriartortitsisoqarnissaanik Folketingimi ilaasortat nunatsinneersut marluk, IA-meersup Aaja Chemnitzip aamma Siumumeersup Aki-Matilda Høegh-Damip, Folketingimi isumaqatigiinniutigineqarnerani piumasarereerallu taamaaliorput.
Nalileeriaasitaassat ukioq 2023 naatinnagu tassa piareersimasussaagaluarput.
Naalagaaffilli nalilersueriaatsinik nutaanik ineriartortitsinissamut atatillugu misissuititseqqaarniarluni aalajangerpoq. Misissuisitseqqaarneq ukioq naatinnagu naammassineqartussaassaaq.
Danmarkimi inuttut pisinnaatitaaffinnik ilisimatusarfiup Danmarkimi kommunit tallimat kalaallit angajoqqaat meeraasa allamut inissinneqaratarsinnaanerannik maanna nalileeriaatsinik (FKU) atuiunnaarnissaannik juunimi kajumissaaruteqarpoq.
Esbjerg Kommune aamma København Kommune maanna nalileeriaasiusunik tamatuma kingorna atuiunnaarput. Kommunilli maanna nalileeriaasiusunik suli atuisut arlaqarput.
Kalaallit angajoqqaat meeraasa allamut inissineqaratarsinnaanerannik Danmarkimi kommunit angajoqqaat piginnaasaannik maanna nalileeriaasiinut akerliussutsimik Nuummi Københavnimilu takutitsisoqaqqammerpoq. Danmarkimi kalaallip arnap meerartaaminik novembarimi arsaarneqareerernerani taamaaliorput. Suliaq taanna Thisted Kommunemi pivoq.

Allisiguk

Aaja Chemnitzip nangitsitsilluni apeqquteqarpoq, taassuma danskit naalakkersuisui Danmarkimi kalaallit ilaqutariit oqaasii kulturiallu eqqarsaatigineqartalernissaannut qulakkeerinissamut akisussaaffimmik tiguserusunnersut apeqqutigaa.

- Isumaqarpunga sapinngisamik mianerinnillutalu eqqarsaatiginnissasugut. Kisianni meeqqap pisinnaatitaaffii tunngavigineqartuaannartariaqarput, kisianni meeqqamut - ajoraluartumik - angajoqqaavinit illersuiniarnermi ilaatigut ulapippallaartoqartarpoq, Mette Frederiksen akissuteqarpoq.

Danskit naalakkersuisui suliamut akuliuttariaqartut

Meeqqanut inuusuttunullu naalakkersuisup, Aqqaluaq B. Egedep (IA) danskillu suleqataata isumaginninnermut ministerip, Sophie Hæstorp Andersenip (S) qaammammi matumani ataatsimiinnerisa kingunerisaanik inissiinermi suliat ministerit akornanni oqaluuserineqalerput.

Aqqaluaq B. Egedep oqarnera naapertorlugu isumaginninnermi ministerip Danmarkimi kommunit angajoqqaat piginnaasaanik misissuutinik kalaallinut ilaqutariinnut atuinerannik unitsitseqqullugit ataatsimiinnermi tassani neriorsuutigaa.

Tamannali Sophie Hæstorp Andersenimit misissuutinik atuinermik unitsitsinissamik isumaliuteqarnissamik kaammattuuteqaannarnermik kinguneqarpoq. Ministerimmi oqarnera naapertorlugu isumaginninnermut ministeritut aalajangiinissamut oqartussaaffeqanngilaq.

Aamma atuarukIsumaginninnermut ministeri kalaallit meerartaannik allamut inisseeratarnissamik suliat pillugit siunersioqatiserineqartoq

Ataatsimiinnerlu taanna ministeriunerup Mette Frederiksenip aamma innersuussutigaa.

- Nalunngilara naalakkersuisut aamma danskit isumaginninnermut ministeriata akornanni oqaloqatigiilluartoqartoq, suleqatigiinnerlu tamanna ingerlatiinnarneqassasoq isumaqarpunga.

- Kisianni aalajangiusimaannassaanga, meeqqanik atugarliornerpaanik ilungersuussinikutut meeqqamik angerlarsimaffiup avataanut inissiinissaq ilaatigut eqqortuusarpoq, taamaalilluta uagut allat paarsisinnaassagatta, ministeriuneq oqarpoq.

Aaja Chemnitz aperigaanni danskit ministeriunerata akissutitai ilungersuussinngillat.

- Danskit naalakkersuisui suliassami matumani akisussaaffimmik annerusumik tigusisariaqarput. Maannakkut folketingimi ilaasortanit ukkatarinnittunit marluinnaavugut, taamalu arriitsigisumik ingerlaannassaguni pisoqarnissaanut ukiut qulit 20-llu ingerlaqqaassapput. Aaqqissuussinermik ilungersuussinngitsumut unammisaqarpugut.

Aqqaluaq B. Egedep oqarnera naapertorlugu danskit naalakkersuisui suliamut akuliuttariaqarput. Taassuma tamanna KNR-imit sapaatip akunnerani siusinnerusukkut apersorneqarnermini oqaatigaa.

- Neriorsueriarluni nunatta naalakkersuisunut imatut iliorniarpunga allatorluinnarlu iliuuseqarluni, taamaattumik suliaq una danskit ministeriinut misaallatsinneqartariaqarpoq, Aqqaluaq B. Egede oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.