Mette Frederiksen Danmarkimi naalakkersuisoqatigiiliorniartussanngorteqqinneqartoq

Ministeriunerugallartoq Mette Frederiksen, Danmarkimi partiit assigiinngitsut kunngimut nalunaaruteqareernerisa kingorna naalakkersuisoqatigiiliorniarnissamut kunngikkormiut sinnerlugit misissuisussatut toqqaqqinneqarpoq. Mette Frederiksen kunngi Frederik Amalienborgimi arfininngornermi oqaloqatigereerlugulu taama oqarpoq.

- Folketingimut Danmarkimi qinersigattali qaammatit marlunngulerput. Naalakkersuisoqatigiiliortoqarnissaanut piffissanngorpoq, taanna oqarpoq.

Partiit qiterliit saamerliillu, tassa Socialdemokratiet, SF-ip, Radikalet Moderaternellu peqataaffigisaannik naalakkersuisoqatigiiliortoqarnissaa siunniukkini taassuma oqaatigaa.

Aqagu sapaammi aallartittussamik piinsi ilanngullugu isumaqatigiinniartoqalernissaa kunngikkormiut misissuisuata naatsorsuutigaa.

Troels Lund Poulsen naalakkersuisoqatigiiliorniaraluartoq

Partiit talerperliit Venstrep, Liberal Alliancep Konservativellu naalakkersuisoqatigiiliorsinnaanissaat Moderaternemeersut tapersersorsinnaanngimmassuk, Venstrep siulittaasuata Troels Lund Poulsenip naalakkersuisoqatigiiliorniarnini iluatsinngilaa, kinalu kunngikkormiut misissuisuatut nutaatut toqqarneqassanersoq arfininngornermi aalajangerneqartussanngorpoq.

- Partiit talerperliit ataatsimoorsinnaannginnerat ulluni makkunani paasinarsivoq, tamanna ersarippoq, siammasissumik tunngaveqartumik naalakkersuisoqatigiiliorsinnaanngitsut takusinnaavarput, Mette Frederiksen Amalienborgip saavani oqarpoq.

Troels Lund Poulsen naalakkersuisoqatigiiliornissamut sapaatit akunnerini marlunni isumaqatiginniarpoq, Mette Frederiksen taassuma siuliani isumaqatigiinniartuulluni.

Naalakkersuisoqatigiinnik qaqugu saqqummiisinnaanerluni Mette Frederiksenip oqaatigiumanngilaa.