Meeraaqqerivimmiittumut ataatap perorsaasunik amigaateqarneq ernumagigaa

Nuummi meeraaqqerivimmi perorsaasunik amigaateqarmat igaffimmi sulisut asaasullu ikiuuttariaqartarput. Pissutsit taakku piviusuusut, meeraaqqeriviup pisortaa oqarpoq.

Komuunini tamani perorsaasut amigaataapput.

Nunatsinni Perorsaasut Kattuffiata Kommuneqarfik Sermersuumut, Qeqqata Kommunianut Kommune Kujallermullu siornamut kisitsisaatai naapertorlugit perorsaasutut nunatsinni atorfiit affaat pallillugit inuttaqanngillat.

Isai soorlumi matoqqasut

Ajornartorsiut Nuummi meeraaqqerivimmi Ungaavaqqami ilisimaneqarluarpoq.

Angajoqqaallu meeqqaminnik aalleraangamik meeraat sulisukinnermit sunnerneqartarsinnaasut angajoqqaat ilaata Inuiaat Tillernerat Oqalliffimmut oqaluttuaraa.

- Qiasimarpasilluni sutteqartoq, ullukkut sutteqarneq ajorluni. Tikikkuminaalluni, isai soorlumi qaminngasut. Anigatta ammarniarsaralugu sivisulaartoq, immaqa akunneq ataaseq, atorparput, taava aatsaat pissutsini tigoqqippaa.

- Immaqa imminut illersorsimalluni imminut pulaannarluni, taavalu taanna peqqinnanngitsutut isigigatsigu assut ernumalersitsisarami, Inuk Silis Høegh oqarpoq.

Inuk Silis Høegh paninilu ataatsimik ukiulik. Asseq: Malik Brøns

 

Panini ullaakkut meeqqanukaakkaangamiuk igaffimmi sulisut asaasullu ikiuuttut takusarlugit taassuma aamma oqaatigaa.

AAMMA ATUARUK Perorsaasussaaleqineq ilungersunarpoq toqqissisimanaranilu

Tamannalu Ungaavaqqap pisortaata uppernarsarpaa.

Sulisut sisamat meeqqat 30-t paarigaat

- Inuup pissutsit oqaatigisai piviusuupput. Qujanartumillu maanna saqqummerput. Pissutsit piviusoqqeqqissaajupput, meeraaqqerivimmi Ungaavaqqami pisortaq, Elisabeth Dahl, Inuiaat Tillernerat Oqalliffimmut oqarpoq.

Elisabeth Dahl Ungaavaqqami pisortaavoq. Asseq: Malik Brøns

 

Sulisut arfineq-marluk aasaq soraarsimammata, meeraaqqerivimmi sulisutigut ajornartorsiortut, pisortaq oqarpoq.

Taassuma Ungaavaaqqami septembarip ulluisa aappaanni sulisut meeqqallu qassiunersut kisimmagit sulisut sisamat meeqqanik 30-nik paarisaqartut paasivaa, tamannalu allallugu.

Qangalili ajornartorsiutaasoq

Ajornartorsiulli nutaajunngilaq.

- 2017-imut 2018-imullu ullorsiutit pigimmatigit taakku misissorakkit aamma taamatut sulisunik amigaateqartarsimaqaat. Taamaammat saqqummiukkusullugit allattornikuuakka, Elisabeth Dahl oqarpoq.

Inuk Silis Høegh angajoqqaallu allat pitsanngorsaasoqarnissaanik kissaateqarlutik kommunimut saaffiginnereerput.

AAMMA ATUARUK Perorsaasut sulisussaaleqineq pissutigalugu stressilersartut

 

Sumiginnarneqapajaarsimasoq eqqumaffigineqarnerulissasoq

Kommunimiillu perorsaasutut atorfimmut atatillugu inissiaqarnissamut pitsaanerusumik periarfissaqartitsilereertut iluarsiissutissarsiorlutillu meeraaqqerivinnik ataatsimeeqateqaqattaartut, Kommuneqarfik Sermersuup meeqqanut atuarfeqarnermullu ingerlatsiviani fagchefiugallartoq Karno Lynge Inuiaat Tillernerannut oqarpoq.

Aamma meeqqanut atuarfinnullu ataatsimut maanna ingerlatsiviusut avissaassasut ulluuneranilu paaqqinnittarfinnut ingerlatsivissaq decembarip aallaqqaataanit atorfeqalertussamik fagschefeqalissasoq Karno Lynge oqarpoq.

-  Taava imaappoq eqqumaffigineqarnerulissapput tamakkua arlaatigut uninngasimasut, imaluunniit sumiginnarneqapajaarsimasutut immaqa oqaatigineqapajaarsinnaasut, Karno Lynge Inuiaat Tillernerannut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat