Meeqqat ataasinngorpamit ataatsimeersualersut
Inuusuttut meeqqat atuarfiannit ilinniartitaanermut ikaarsaariartarnerat pillugu ataasinngorpamit sammineqassaaq.
Ataatsimeersuarnermi NAKUUSA aaqqissuisuusoq, ilaatigut Meeqqat Pisinnaatitaaffiinut Sullissivik, MIO peqatigalugu qulequtarineqartoq pillugu siunnersuuteqaqqusaasimapput. Inuusuttullu meeqqat atuarfiata qanoq pitsangorsarneqarsinnaaneranik kaammattuutinik
siorna suliaqarput. Inuusuttut tuluit oqaasiinik ilinniartitsinerup siusinnerusukkut allartittarnissaa vikareqartarnerullu
annikillisinneqarnissaa ilaatigut kaammattuutigaat.
Meeqqat atuarfiannit soraarummeertut 50 procentii atuarfimmi naammassereeramik kingorna ingerlaqqinngitsoortarnerat misissuinerit arlallit takutippaat, maannalu NAKUUSA MIO-lu pissutsit qanoq ililluni pitsanngortsinneqarsinnaanerannik inuusuttunit ikioqqupput. NAKUUSA tusagassiuutinut taama nalunaaruteqarpoq.
Qatanngutigiit Elsnerikkut peqataalersut
Christian aamma Frederik Elsner nipilersoqatigiinnit NANOOK-mit tusaamasat ataatsimeersuarnermi ilaassapput.
Ilaatigut Christian aamma Frederik Elsner workshoppertitsisuussallutik.
- Qulequtarineqartoq ilinniartitaaneq pingaaruteqarpoq. Marluulluta nammineerluta
unammilligassaqarsimavugut inuiaqatigiillumi eqqarsaatigalugit aallussinissaq pingaaruteqarpoq.
Ilinniartitaaneq patajaatsumik amerlanernik periarfissaqarluni siunissaqarnissamut toqqammavissiisarpoq, inuiaqatigiinnulli tamanut ineriartornissamut aamma toqqammavissaasarluni, Christian Elsner oqarpoq.
Qatanngutigiit Elsnerikkut saniatigut inuusuttut ilaatigut Maren-Louise Poulsen Kristensenimit, Katrina Boassenimit,
Nina Skydsbjerg Jacobsenimit Josef Tarrammillu ikiorneqassapput.
Meeqqat ataatsimeersuarneranni inuusuttut Qaasuitsup kommunianit, Qeqqata kommunianit, Kommuneqarfik
Sermersuumit Kommune Kujallermiillu peqataassapput.
Taakku Ilulissani ataasinngornermit oktoberip qulingiluaannit oktobarip 14-iata tungaannut ataatsimuussapput. Inuusuttut 13-it 18-illu akornanni ukioqarput, taakkulu 37-t kommuniminni meeqqat sinniisaanneersuullutik.