Meeqqat aqqaneq marluk advent siulleq angajoqqaatik ilaginagit
Anaana ataatalu erngutileraangata meeqqat ukiukinnerit isumakulunnartumik amerlasuut imminnut isumagisariaqartarput.
Juulli meeqqanut tamanut qilanaarnaranilu nuannisaarfiuneq ajorpoq. Angajoqqaarpassuit erngutileraangamik ikiarrutileraangamillu meqqatik ajoraluartumik sumiginnartarpaat.
Kommuninut sisamanut taamungaannaq toqakkatsinnut attaveqarnitsinni paasivarput, meeqqat aqqaneq marluk angajoqqaatik ilaginagit adventip sapaataa siulleq nalliussisariaqarsimagaat, angerlarsimaffiup avataanut pisortanit inissineqarallarlutik.
Nunatsinni illoqarfiit pingaarnersaanni Nuummi pisortat marlulissat pingasunik qaammatillit nukappiaqqallu marluk, aappaa marlunnik aappaalu aappaa affarmik ukiulik, angerlarsimaffiup avataanut inissikkasuartariaqarsimavaat. Nuummi aamma meeqqat ukiukitsut marluk allat anaanartik ilagalugu qimarnguiliartariaqarsimapput.
Upernavimmi meeraq tallimanngornerup arfininngornerullu unnuaani angerlarsimaffimmut allamut pisortanit inissinneqartariaqarsimavoq.
Tasiilami meeqqat marluk angerlarsimaffianniit peerneqartariaqarsimapput.
Qaqortumi qatanngutigiit pingasut, arfineq pingasunik, arfineq marlunnik marlullu missaanik ukiullit unnuami angajoqqaaminnik ujarlileruttortut ambulance-nit napparsimmaviliaanneqartut, Radioaviisimit siusinnerusukkut oqaluttuaraarput.
