Marluk allat tunillanneqarsimasut: Kalaallit Nunaata Kujataani tunillanneqarsinnaaneq ilimanaateqarluinnartutut massakkut nalilerneqarpoq

Air Greenlandip timmisartuanut GL 421-mut ilaallutik Nuummiit Narsarsualiartut marluk allat coronavirusimik tunillanneqarsimasut ataasinngornermi paasineqarpoq.

Coronavirusimik tunillanneqarsimasutut ataasinngornermi paasineqartut katillutik maanna taava tallimanngorput. Tunillanneqarsimasummi pingasut ulloq taanna siusinnerusukkut paasineqartut - marluk Sisimiuni ataaserlu Qaqortumi.

Tunillanneqarsimasutut siumorneqartut marluk timmisartumut GL 421-mut ilaallutik Nuummiit juulip ulluisa arfineq-pingajuani Narsarsualiarsimapput. Namminersorlutik Oqartussat tusagassiutinut taama nalunaaruteqarput.

Ilaasoq nunami allami tunillanneqarsimassangatinneqartoq timmisartumut GL 427-mut juulip ulluisa arfernanni ilaasimavoq. Timmisartoq pineqartoq Kangerlussuarmiit Narsarsuarmukartussaagaluarluni Nuummut tikittussanngortinneqarsimavoq.

Tunillanneqarsinnaaneq ilimanaateqarluinnartoq

Timmisartunut GL 421-mut GL 427-mullu ilaasut tamarmik angerlarsimaannaqquneqarput, piaarnerpaamillu misissorneqaqqullutik.

Kalaallit Nunaata Kujataani tunillanneqarsinnaaneq ilimanaateqarluinnartutut massakkut nalilerneqarpoq. Namminersorlutik Oqartussat taama nalunaaruteqarput.

Innuttaasut tunillatsissimasinnaanermut ersiuteqarnertik eqqumaffigissavaat, napparsimasutullu misigigunik misissortillutik.

Ullumi aamma misissuisoqassaaq, pilersaarullu ima isikkoqarpoq:

Marlunngornermut juulip ulluisa 13-iannut pilersaarut:

Nuuk:

• Inuit timmisartuni il.il. tunillatsissimasinnaasut nal. 10:30-miit 12:00-imut misissortissinnaapput.
• Ullut tallimassaanni misissortinnerit nalinginnaasut nalinginnaasumik 08:15-imiit 10:00-imut ammasarput.
• Misissuinerit Misissuivimmi, siornatigut Kalaaliaraasimasumi, Nuup qeqqani Brugsenip eqqaaniittumi ingerlanneqartarput.

Qaqortoq:

• Napparsimmavimmi misissuinissat nal. 09:00 ammassapput.
• Misissuineq nunap immikkoortuata napparsimmaviani ingerlanneqassaaq.

Ilulissat:

• Inuit timmisartuni il.il. tunillatsissimasinnaasut napparsimmavimmi nal. 13-imiit misissorneqarsinnaapput.
• Ullut tallimassaanni misissortinnerit nalinginnaasut nalinginnaasumik 09:00-imiit ammasarput.
• Misissuineq nunap immikkoortuata napparsimmaviani ingerlanneqassaaq.

Innuttaasut tunillatsissimasinnaanermut ersiuteqarnertik eqqumaffigissavaat, napparsimasutullu misigigunik misissortillutik. Peqqissaavimmut qaninnermut oqarasuaatikkut piaarnerpaamik saaffiginnittoqassaaq.