Lars-Emil Johansenip marloqiusamik atorfeqarnini – Folketingimi ilaasortatut aamma Aningaasaqarnermut Nunanullu Allanut Naalakkersuisutut – ingerlatinnarniarallarpaa, ilisimasaarutigeriikkamisut juunip aallaaqqaataani folketingimit tunuarani.
Lars-Emil Johansenip Namminersorneq pillugu Ataatsimiititaliarsuarmi sulinini ukiamut naammasseqqaarusuppaa, taamaattumillu oktobarip aappaani folketingimi issiavini Doris Jakobsenimut aatsaat tunniunniarlugu.
Inatsisartuni ilaasortanut apeqqutigaarput qanoq tamanna isumaqarfigineraat.
Siumut politikkikkut oqaaseqartartua Jens Lars Fleischer oqarpoq, Lars-Emil Johansenip folketingimi suliami saniatigut naalakkersuisuunera ajoriffissaqartinnagu. Naallu marloqiusamik qaffasissunik atorfeqarfeqartannginnissaq Siumumi ileqqussatut aalajangiunneqareeraluartoq, Lars-Emil Johansen folketingimi ukiaru sulinerup aallartinnissaata tungaannaanut ingerlassammat akuerisariaqarsoraa.
Atassutip politikkikkut oqaaseqartartua Namminersorneq pillugu ataatsimiititaliami nammineq aamma ilaasortaasoq Augusta Salling oqarpoq, Lars-Emil Johansenip folketingimi sulinerata naalakkersuinermi sulinermut akornutaasinnaanera allat naliligassarigaat. Nammineq isumaqarpoq, Lars-Emil Johansenip ataatsimiititaliami suliani naammassippagu pitsaanerussasoq.
- Doris Jakobsen ataatsimiititaliarsuarmi nutaamik suleqataalissaguni kigaaloqutaaginnarsinnaavoq, taamaammat Lars-Emil Johansen suliaminik naammassinnikkuni pitsaaneruvoq, Augusta Salling oqarpoq.
Illuatungiliuttut allarluinnarmik isumaqarput.
Demokraatinit Per Berthelsen isumaqarpoq marloqiusamik akisussaaffeqarneq assut mamaatsoornartoq. Ulloq naallugu atorfiit marluk qaammammusiallu marluk.
– Naamik, akuerineqarsinnaanngilaq, Per Berthelsen erseqqissaavoq.
Inatsisartuni Attaviitsutut inissisimasoq Esmar Bergstrøm, Nuup Kommunalbestyrelseani aamma ilaasortaasoq, sulianik taama pingaaruteqartigisunik marloqiusamik suliaqarneq akuersaarsinnaanagu oqarpoq.
Inatsisartuni Kattusseqatigiit Partiiat sinnerlugu ilaasortaq Anthon Frederiksen, Ilulissani aamma borgmesteriusoq oqarpoq, marloqiusamik qaffasissunik atorfeqarneq Siumut partiiata nammineq ajornartorsiutigissagaa. Ajornartorsiortoqaleraluarpallu tamanna naalakkersuisooqatigiit Siumut-p Atassutillu akisussaaffigigaat.
Lars-Emil Johansenip naalakkersuisuni aamma folketingimi taamatullu Namminersorneq Pillugu ataatsimiititaliarsuarmi ataatsikkut atuuffeqalernera, Inatsisartuni illuatungiliuttut Inuit Ataqatigiit isornartoqartippaat.
Asii Chemnitz Narup allappoq, piumasaralugu Naalakkersuisut siulittaasuata Hans Enoksenip maanna demokratiimik paasinnittaatsini qanorlu siunnerfeqarnini pillugu innuttaasunut sukumiisumik nassuiaateqartariaqartoq.
