Markus Jensen Arsallammattut toqqagaavoq
Arsallammattut toqqagaasut ukiut pingasut kingulliit G-44-mit Qeqertarsuarmeersuusarput. Ukiormanna Arsallammanngortoq tassaavoq Markus Jensen Nagdlúnguameersoq.
Arsallammanngortup aqqa KNR-meersup Mathias Davidsenip højtalerikkut nalunaarutigimmagu Ilulissat timersortarfiani nuannannersuaqarpoq arfininngornermi unnukkut GM-rtut naggataarneranni.
Markus Jensenip Nagdlúnguup angusarissaarneranut pissutaaqataalluinnarpoq klubbillu unammisaasa kisimik takutitsilluarnera maluginiarsimanngilaat. Dommerit aamma maluginiarsimavaat Arsalerillammattullu toqqarlugu.
Sukataallammak aamma dommerit toqqarpaat. Tassanilu Norsaq Lund Mathæussen B-67-imeersoq toqqagaavoq. Tunniutiinnajuilluni ilungersortuarnera pissutaaqataalluarpoq Norsaq finale-mi iliminut ajugaatitsissutaasunik pingasoraarmat.