Ujaasineq: Maqaasineqartut pingasut ujaarineqarnerat unitsinneqartoq
Angutit pingasut Pocamik qaqortumik angallateqartut Ilulissat eqqaani ataasinngormalli ujaarineqalernerat maanna unitsinneqarpoq.
Issittumi Sakkutooqarfik Facebookikkut allappoq.
- Suleqatigiiaat assigiinngitsut annertuumik ulluni arlaqartuni ujaasereernerata kingorna ajoraluartumik paasisariaqarparput angutit pingasut nassaarisinnaanatigit. Qanigisaasut artorsarfianni sulilu susoqarsimaneranik ilisimannittoqartinnagu ujaasinermik unitsitsinissaq oqitsuunngisaannarpoq, taamaattorli pisortaninngaanniit nalilersuinerit katiternerisigut piffissanngorsimavoq ujaasinerup unitsinnissaa, Issittumi Sakkutooqarfimmi kommandørkaptajn, Brian Jensen oqarpoq.
Arfininngormalli takuneqartut
Angutit pingasut Qeqertamiit Ilulissat tungaannut arfininngormat aallarsimapput, taakkuli ataasinngornermi apuuffissaminnut suli apuussimanatillu tutsaqarsimanngillat. Taamaammat ujaasineq Kalaallit Nunaanni Politiit Issittumi Sakkutooqarfiullu suleqatigiinneratigut ataasinngornermi aallartinneqarpoq.
Innuttaasup nalunaaruteqarnerata kingunerisaanik umiatsiaaraq qaqortoq oqartussanit pingasunngornermi nassaarineqarpoq, angutilli pingasut ajoraluartumik nassaarineqaratik. Umiatsiaaqqap misissorneqarnerani angutit pingasut ajutoorsimasut takussutissaqartoq, Issittumi Sakkutooqarfik Facebookikkut allappoq.
Taamaammat politiit suliaq Issittumi Sakkutooqarfimmit tiguaa.
- Isummersuinarsimavortaaq innuttaasut taama amerlatigisut ujaasinermi ikiuussimammata taakkulu annertuumik nersualaagassaapput, Brian Jensen oqarpoq.
Qanigisaasut kalerrinneqarput.
