Ujaasineq: Angutit pingasut Ilulissani maqaasineqartut
Angutit pingasut Ilulissanut ualeq manna tikittussaagaluartut suli tikinngillat. Taamaammat oqartussanit ujaarineqalerput.
Issittumi Sakkutooqarfik Facebookimi quppernerminni allappoq.
Taakku Kalaallit Nunaanni Politiinit nalunaaqutaq 13.10 nalunaarfigineqarput.
Angutit Qeqertamit Pocamik qaqortumik umiatsiaararlutik Ilulissat tungaanut arfininngornermi aallarput. Angutit suli tikinnginnerat pissutigalugu Issittumi Sakkutooqarfik Air Greenlandip annaassiniarnermut qulimiguulia atorlugu qulaavapput, politiillu angallamminnik aamma ujaasillutik.
Illersornissaqarfiup timmisartua sumiiffinni ujaasinermut aamma ikiuukkiartorpoq.
- Ujaasinermi matumani atorsinnaasagut tamarmik aallartippagut, Issittumi Sakkutooqarfiup tusagassiisartua, Camilla Schouw Broholm KNR-imut oqarpoq.
Oqartussanut iluaqutaasinnaasumik paasissutissaateqaruit Kalaallit Nunaanni Politiinut oqarasuaammut 701448-mut attaveqassaatit. Oqartussat tamatuma saniatigut sumiiffimmi najugaqartut maqaasineqartunik umiatsiaaraannillu alaatsinaannissaannik kaammattuuteqarfigaat.
Sumiiffimmi Aasiaat Radioatigut nalunaaruteqartoqarpoq, taamaalillutik alaatsinaannermut ikiuisinnaassallutik.
