Ujaasineq: Angutit pingasut maqaasineqartut ujaarineqarnerat nanginneqartoq
![](/sites/default/files/styles/image_934x467/public/2023-11/400415072_713763817446332_974347267147721020_n.jpg?itok=a7dyOFZ6)
Angutit pingasut qaqortumik Pocamik umiatsiaararlutik Qeqertamiit Ilulissat tungaannukarlutik aallartut maqaasineqarput, oqartussallu taakkuninnga ataasinngornermi ujaasinertik taarsinerani taamaatikkallarpaat.
Angutilli pingasut maqaasineqartut taakku marlunngornermi ullaakkut qulingiluat missaanniit ujaarileqqikkitsik, Issittumi Sakkutooqarfik Facebookimini allappoq.
'Ajoraluartumik suli nassaarineqanngitsut, sulili ujaarineqartut', Issittumi Sakkutooqarfik Facebookimini aamma allappoq.
Arfininngormat kingullermik takuneqartut
Angut pingasut maqaasineqartut Qeqertamiit Ilulissat tungaannukarlutik qaqortumik Pocamik umiatsiaararlutik aallartut Ilulissanut ataasinngornermi tikissangatinneqarsimagaluartut tikissimanngimmata maqaasineqartut politiit Issittumi Sakkutooqarfimmut ataasinngornermi ullukkut ataatsip qaangilaaraa kalerriimmata ujaasineq aallartippoq.
Issittumi Sakkutooqarfiup umiarsuaa alapernaarsuut Lauge Koch aamma ujaarinnissutaavoq. Umiarsuarmi tassani inuttat ujaasinermi ataqatigiissaarisuupput.
- Ujaaseqataasinnaasut tamarmik ikiuupput, Issittumi Sakkutooqarfiup tusagassiinermi akisussaasua Camilla Schouw Broholm KNR-imut ataasinngornermi oqarpoq.
Issittumi Sakkutooqarfiup umiarsuaata alapernaarsuutip Lauge Kochip aamma ujaarinnissutaanerata saniatigut Air Greenlandip annaassiniarnermut qulimiguulia taavalu Illersornissaqarfiup timmisartua ujaarinnissutaapput.
Taamaammat Qeqertap Ilulissalllu nalaanniittut alapernaarsortuarsinnassasut, oqartussat neriuutigaat. Maqaasineqartut pillugit ujaasinermi iluaqutaasinnaasunik paasissutissaatillit, Kalaallit Nunaata Politiivinut 701448-mut sianerlutik attaveqaqquneqarput.