Ataatsimiititaliap siulittaasua: Malimmut atatillugu periarfissanik allanik ujartuissaagut

Naluttarfik Malik naluttarfiup illutaata nungullarnera aserorterneralu pissutigalugit ukiup ataatsip missaani matoqqatinneqassasoq Kommuneqarfik Sermersuumi kommunalbestyrelsip marlunngormat nalunaarutigaa.

Tamanna innuttaasut, peqatigiiffiit naluttartullu uggoraat.

Kommunilli sanaartornermut avatangiisinullu ataatsimiititaliaani siulittaasup, Justus Hansenip Demokraatineersup allaanerusinnaannginnerarpaa:

- Soorunami pitsaanerpaanngilaq. Kisianni pissutsit taamaapput. Nuummi najugaqartunut tikeraanullu soqutiginarluinnartuusoq maanna ukiumi ataatsimi matoqqatinneqartariaqalerpoq, taanna oqarpoq.

Justus Hansenilli suliaqarnerup qanoq sivisutiginissaa qaqugulu aallartinnissaa erseqqissumik oqaatigisinnaanngilaa:

- Imaassinnaavoq 2025-mut kinguartinneqartoq. Sanaartornissamut pilersaarutip qaqugu aallartinnissaa apeqqutaavoq. Kisianni aporfiusinnaasut annikinnerpaatinniarlugit aasaaneranut tunngaviusumik inissinniarneqassaaq, taanna oqarpoq, nangillunilu:

- Suut suliassaanersut suliarineqarnerata qanoq sivisutiginissaa Rambøllip misissussavaa. Peqqissaartumik ajoqutaannginnerpaasumillu suliarineqassaaq, Justus Hansen oqarpoq.

Suliarineqarnissaata agguataarneqarnissaa ammaffigigaat

Kommunip sanaartornermik suliffeqarfik naluttarfiup Maliup agguataaraluni matusinnaanissaanik periarfissaqarsinnaanersoq aamma misissueqquaa, innuttaasummi ukioq ataaseq nalunngitsoortariaqanngillat.

Tamannali oqaatigissallugu suli siusippallaartoq, Justus Hansen oqarpoq:

- Aamma soorunami agguataarlugu suliarineqarsinnaanersoq apeqqutigaara. Taamaalilluni immaqa naluttarfiup aappaa ajoquteqartoq siullermik matuneqarluni. Kisianni tamanna piffissami matumani oqaatigineqarsinnaanngilaq. Pilersaarusiornerup tamanna ilaatigut akissutissaqartissavaa, taanna oqarpoq.

Nunatsinni naluttartut nunanut allanut unammisartuisa sungiusaasuat KNR-ikkut oqaaseqartunut ilanngulluni nunatsinni naluttarfiit annersaata taamatullu nunanut allanut unammisartut sungiusartarfituaata matugallarnissaa uggoralugu ippassaq oqaatigaa.

Immaqa aaqqiissutaagallartumik pilersitsisoqarsinnaasoq

Nalunnermik nunanut allanut unammisartut sungiusaasuata, Jonas Tetzscherip apersorneqarnermini tassani naluttarfimmik angallattakkamik aaqqiissuteqartoqarallarsinnaanissaanut ingerlatsivimmut aamma sanaartornermut avatangiisinullu ataatsimiititaliap siulittaasuanut oktobarimi siunnersuuteqarsimalluni oqaatigaa.

Justus Hansenili tassunga tunngatillugu aperigaanni taassuma timersortartunit isumassarsiat toqqaannartumik itigartitsissutiginagit oqaatigaa. Taamaakkaluartorli kommunip aaqqiissutissat nammineq naatsorsoqqaarniarai erseqqissaatigalugu:

- Tamakkumi akii ilisimanngilagut. Kisianni suut tamarmik qaqissavagut, akit aamma pitsaasut ajoqutaasullu misissussavagut. Taamaammat tamanna ammaffigilluinnarparput. Kisianni neriorsuuteqarsinnaanngilluinnarpunga, Justus Hansen oqarpoq, taassumalu iluarsartuussisoqarnerata nalaani aaqqiissutaagallarsinnaasunik ujartuisoqassasoq erseqqissaatigalugu.

- Taamaaliussaagut, Naluttarfiummi Maliup matoqqanissaa sivisoorujussuuvoq. Taamaammat periarfissat tamaasa eqqartussavagut.