Maligiaq Padilla: Ernummatiginerpaasara tassaavoq oqaatsitta annaanissaat
Maligiaq Padilla Sisimiuneersoq naggueqatitta piorsarsimassutsikkut annaasaqarsimasut siuarsaaqataaffigerusullugit Alaskamut ukiut 14-it matuma siorna nuuppoq.
Maligiaq Padilla 16-it 17-illu akornanni ukioqarluni USA-mi ukiinermini Alaskamut angalavoq, Alaskamilu naggueqatitta piorsarsimassutsimikkut qanoq annaasaqarsimatiginerat takoreernerata kingorna tammatsaaliueqataarusulluni aalajangerpoq.
- Alaskamut angalaninni naggueqatitta piorsarsimassutsikkut oqaatsimikkullu qanoq annaasaqarsimatiginerat qanorlu naqisimaneqartiginerat takoreerlugu inersimasunngorninni taakani arlaatigut sunniuteqarsinnaanissara pilerigilersimavara, Maligiaq Padilla Alaskami 2009-imiit 2020-ip tungaanut najugaqarnikoq oqarpoq.
Alaskami najugaqarnermini qaanniorneq qajartortitsinerlu atuarfinni assigiingitsuni ilinniartitsissutigisarpai.
- Una qajaq Alaskami tammavissimasoq uterteqqinniarsaralugu tammatsaaliorlugu suliaqarninni pingaarnerpaatut pilerinarnerpaatut ilinniartitsissutigalugu aallunnikuuara, Maligiaq Padilla oqarpoq.
Maligiaq Padillallu nunarput taama inissisimalissagaluarpat ernummatigaa.
Oqartussaassusiiarneqarnissaq ernumanartoq
Amerikami præsidentip Donald Trumpip nunarput aappassaanik pisiarerusullugu oqareersoq, nunatsinnillu aqutsilernissani soqutigalugu ivertinneqannginnermini oqaatigaa. Nunarpullu tuniniagaanngitsoq, USA-mullu tunineqarnavianngitsoq Naalakkersuisut siulittaasuata Múte B. Egedep (IA) oqaatigaa.
Tamannalu piviusunngussangaluarpat Maligiaq Padilla oqartussaassutsitta annaaratarsinnaaneranut ernumavoq.
- Ernummatima siullerpaat ilagivaat USA-mut assersuutigiinnarlugu ilaalissagaluarutta oqaatsitta siullersaallutik saassunneqarnissaat taakkulu generationip tullianut sulissutigineqarnissaat tammariartortillugit tuluttut oqalutsinniarluta, Maligiaq Padilla oqarpoq.
Oqaatsitta, oqartussaassusittalu annaanissaat kisimik ernumanartoqanngitsut, ilinniarniissaq nakorsiarnissarlu aamma akeqalerpata inuit aningaasaateqarnerpaajunngitsut atugarliornerulersinnaanerat aamma ernumanartoqartippaa.
Aningaasaqarneq allanngorujussuartariaqalersinnaasoq
Maligiaq Padilla namminersortutut qaanniorluni qajartortitsillunilu angalasarnermini inuit naapittakkani aningaasaateqarnerpaajunngitsut ikiorneqartanngitsut naapittarlugit ilaatigut oqaluttuaraa. Ilinniarnerulli tungaatigut aqqusaarsimasani ima oqaluttuaraa:
- Tassa nuliakora taamanikkut universitetimi eqqartuussissuserisutut ukiut sisamat ilinniarpoq, taava ilinniarnera ukiumut 350.000 koruuninik naleqarpoq, ilinniakkanilu naammassigamiuk aamma Ph.d-inngorniuteqarpoq naammassigami katillugit 2.8 millionit koruuninik naalagaaffimmut akiitsoqalerpoq inuunermi sinneranik akilersungassaminik, Maligiaq Padilla oqarpoq.
USA-miusut innuttaassuseqaleraluarutta meeqqat atuarfianni ingerlariaqqiffinnilu nammineerluta akiliisalissasugut, nakorsiassanguttalu peqqinnissaqarfimmut aamma akiliisassasugut, ikiorneqarnissamillu pisariaqartitsisut ajornartorsiornerulersinnaasut.
Ilisimatusarfimmi lektori Steven Arnfjord KNR-imit januaarip 14-iani apersorneqarami aamma oqaatigaa.
- Ajortuinnarnik isiginiartutut pigaanni, taamatullu pisoqassappat pisortatigut ikiorsiissutit tapiissutit siullertut annaassavagut. Tassalu meeqqat atuarfianni ilinniagaqarnissamullu periarfissat namminersortunngorsarneqassapput. Tassalu meqqat atuarfianniit ingerlaqqilluni ilinniarniaraanni ilinniarniartoq nammineq akiliisalertussaassaaq, peqqinnissaqarfimmillu atuineq aamma akeqalertussaassaaq,
- Napparsimaleraanni ajoqusersimagaanniluunniit, taava nakorsiaraanni nammineq akileeqqaartariaqarpoq. Taamaalillutit siornatigornit akiliinerusariaqartalissaatit, Steven Arnfjord oqarpoq.
Nunattalu USA-mut atalinngisaannarnissaa Maligiaq Padillap neriuutigaa:
- Tassa neriuppunga inuutilluunga aamma qaquguluunniit USA-mut atalinngisaannassasugut nunatsinnimi kiffaanngissuserujussuaqarpugut maani taavalu nunarput annertoorujussuaq oqartussaaffigaarput, taanna oqarpoq.
Maligiaq Padilla Alaskami ukiuni qulini namminersortutut sulivoq. Nuummullu 2020-mi nuuppoq sulilu maanna Nuummiuulluni.
