Atassut: Amerikamiut Pituffiliaannalernerat saammarsaataavoq

USA-mi nukissiuuteqarnermut ministeri, Chris Wright,  isumannaatsuunissamut siunnersorti, Mike Waltz,  præsidentillu tullersortaata nuliata, Usha Vancep Sisimiunukarlutillu Nuummukarnissaraluat taamaatippoq. USA-p præsidentiata tullersortaa, JD Vance nuliilu, taarsiullugu Pituffimmukaannalerput.

Nukissiuuteqarnermut ministeri, isumannaatsuunissamullu siunnersorti Pituffimmukaqataassanersut erseqqissumik paasissutissiissutigineqanngilaq.

Nunatsinni inoqarfinnut allanut USA-mi pissaaneqangaartunik tikittoqalinnginnera Atassutip siulittaasunut toqqissiallaataavoq.

- Tassa taanna saammarsaataakuttoorsinnaavoq. Pituffik namminneq ingerlatarigamikku taanna alakkarlissuk, qanoq inerisarniarnerlugulu namminneq niaqorluutigilissuk, Aqqalu Jerimiassen KNR-mut oqarpoq.

Aarlerisoq

Taassuma Kalaallit Nunaanni naalakkersuisoqatigiilernissamut isumaqatigiinniartoqarnerani, naalakkersuisussanillu suli ivertitsisoqannginnerani nunani allani qinikkat Kalaallit Nunaannukarnissaat tulluartuutinngilaa. Sunniiniarsinnaanerammi aarleqqutigaa.

- Ungavarsimaarallarnialermata naalakkersuisutaannginnitsinni tikinniarunnaarnerat toqqissiallannarpoq. Atagu Naalakkersuisut siulittaasoqalereerutta taamaaliorniarunik taamaaliorlik, kisianni aqqutit eqqortut atorlugit, taamannak tikinniaannaavileriataaratik. Oqaloqatigiinnerit eqqortut malillugit, inersimasorpalaalaarlutik, Aqqalu Jerimiassen oqarpoq.

Allanngortitseqattaarneq

USA-mi pissaanilinnit kikkut Kalaallit Nunaannukarniarnersut ulluni kingullerni allanngorangaatsiarluni nalunaarutaasarpoq. Tamanna pitsaanngitsoq partiip siulittaasua isumaqarpoq.

- Politikkikkut siuttui ataatsimilluunniit naatsorsuutissaanngillat. Isummatillu nikittut ullormit ullormut politikkeqarput. Ullormit ullormut politikki nunatsinni atorsinnaanngilaq.

- Taanna USA-p atorniarsarisaa sunniiniarsarineq isummatillu nikittut, saqiallattut, ingerlaannaq taamannak iliortarneri neriuppunga arlaatigut nunatsinniit taanna ataatsimoorussamik aaqqiivigiumaaripput. Taavalu oqariartorfigalugit iluamik pissuserissaalaartariaqartut, Aqqalu Jerimiassen oqarpoq.

Partiit sinneri nipaarluusut

KNR-ip Naleqqap siulittaasua, Pele Broberg, pisoq pillugu apersorniarlugu attaveqarfigigaluarpaa. Taannali USA-mi vicepræsidentip Pituffilialerneranut USA-miillu tikeraartussaagaluit allat taamaatitsiinnarnerannut tunngasumik oqaaseqarusunngilaq.

Demokraatit siulittaasuat, Jeens Frederik Nielsen, naalakkersuisunngornissamik isumaqartigiinnialeruttortoq, tamatumunnga tunngasumik oqaaseqarumanngilaq.

Inuit Ataqatigiit Siumullu siulittaasui aamma attaveqarfigisaraluarpagut. Ilanngutassialli suliarinerata nalaani akissutissarsinngilagut.