KNR-ip paasivaa: Siumut naalakkersuisoqatigiinnit tunuartoq

Naalakkersuisunit marluk tassa IA-meersup Demokraatineersullu folketingimut qineqqusaarnerisa nalunaarutigineqarnerata ilutigisaanik Siumut naalakkersuisoqatigiinnit tunuarniarluni sapaatip akunnerani matumani siusinnerusukkut sioorasaaruteqarpoq.

Partiip sioorasaarut taanna maanna eqquutsikkaa tusatsiarneqarpoq.

Tusarfiup tamanna KNR-imut uppernarsaraa, taassuma partiip siulittaasuata, Aleqa Hammondip naalakkersuisut siulittaasuat, Jens-Frederik Nielsen partiip aalajangerneranik nalunaarfigisimagaa aamma oqaatigaa.

Naalakkersuisut marluk sassartut tassaapput peqqissutsimut inunnullu innarluutilinnut naalakkersuisoq, Anna Wangenheim sapaatip akunnerata siuliani tallimanngornermi qineqqusaarnerminik nalunaaruteqartoq aamma naligiissitaanermut, inatsisit atuutsinneqarnerannut aatsitassanullu naalakkersuisoq, IA-miit Naaja H. Nathanielsen qineqqusaarnerminik sapaatip akunnerani matumani nalunaaruteqartoq.

Partiip naalakkersuisoqatigiinnit tunuarnerani naalakkersuisoqatigiit qinigaatitat sisamat annaavaat, partiilli sinneruttut 19-inik qinigaatitaqarlutik suli amerlanerussuteqarput.

KNR-ip Siumup siulittaasua Aleqa Hammond aamma naalakkersuisut siulittaasuat Jens-Frederik Nielsen oqaaseqartinniarsarai.

Siulittaasup naalakkersuisoqarfiata nunanut allanut naalakkersuisup, Vivian Motzfeldtip atuuffimminit tunuarnera tusagassiuutinut nalunaarutigeqqammerluinnarpaa.

Naalakkersuisut siulittaasuat, Jens-Frederik Nielsen tusagassiortunut ullumi sassatsiassaaq.

Jens-Frederik Nielsenip 'Siumup aalajangernera ataqqillugu' tamannali pakatsissutigalugu, Facebookikkut allappaa.

Nutarterneqarpoq...