Jens-Frederik Nielsen: - Aalajangiineq ataqqivara, kisianni pakatsivunga

Siumut naalakkersuisoqatigiinnit tunuarnera nalunaarutigineqaqqammerpoq. Naalakkersuisut siulittaasuat, Jens-Frederik Nielsen tamanna pillugu tusagassiortunut maanna katersortitsivoq.

Maana malinnaagit.

Siumut naalakkersuisooqatigiinniit aniniarlutik nalunaaruteqarnerat Naalakkersuisut siulittaasuata uggoralugu pakatsissutigaa. Tunuarniuteqarnerallu ataqqillugu Jens -Frederik Nielsen (D) oqarpoq.

- Nunatsinni avataaniit tatiniarneqarnitsinni nunatut politikkikkut inuiaqatigiittullu aatsaat taama ataatsimoornissaq pisariaqartigaaq. Taannalu ataatsimoorneq maannakkut takusinnaasatsitut ajoraluartumik allanngulaarpasippoq, naalakkersuisut siulittaasuat Jens-Frederik Nielsen (D) oqarpoq.

Vivian Motzfeldtip naalakkersuisuusimaneranut qujassuteqartoq

Siumup naalakkersuisuutitarisimasaa Vivian Motzfeldt naalakkersuisutut tunuarneranut atatillugu Jens-Frederik Nielsenip (D) qujassuteqarfigaa.

- Naalakkersuisuusimasoq Siumut sinnerlugu qujaffigerusuppara tunniussaanut isumaqatigiissutinik qulakkeerinninneqataalluni nunatta sammineqarnerani tatineqarneranilu aamma kivitseqataalluni, Jens Frederik Nielsen (D) oqarpoq.

Nunanut allanut tunngasunut ilinniartitaanermullu naalakkersuisoq Vivian Motzfeldt (S) naalakkersuisutut tunuarnerani akisussaaffia Naalakkersuisut siulittaasuannit Jens-Frederik Nielsenimit (D) akisussaaffigineqalissaaq.

Naalakkersuisut suliatik unitsiinnarnavianngikkaat

Naalakkersuisooqatigiinnit Siumut ilaajunnaaraluartoq naalakkersuisut sulinertik unitsissanngikkaat taassuma ilanngullugu oqaatigaa.

Inuiaqatigiinnillu toqqissisimatitsinissaq, politikkikkullu suli ataatsimoortoqarnissaa qulakkiissallugu, naalakkersuisut siulittaasuata oqaatigaa.

Peqqissutsimut naalakkersuisoq Anna Wangenheim (D) Inatsisillu atuutsinneqarnerannut naalakkersuisoq Naaja Nathanielsen (IA) folketingimut qinigaassagaluarpata inuttaleqqinnissaat suliarineqarumaartoq Jens-Frederik Nielsen (D) oqarpoq. 

- Folketingimut qinersinerup takutissuaa qanoq pisoqarumaarnersoq.

Nutaarsiassaqartitsivik Sermitsiamit aperineqarami Jens-Frederik Nielsen oqarpoq.

Naalakkersuisuni atuuffiit marluk suli inissitassaasut

Folketingimut qinersisoqarnissaanut ullut aqqaniliinnanngorput, naalakkersuisullu marluk folketingimut sassaraluartut suliat allanngortinneqaratillu nikisinneqanngillat.

Bentiaraq Ottosenip (A) Maasi Pedersenillu (IA) naalakkersuisutut tunuarnerisa kingorna atuuffiit marluk suli inissinneqanngillat.

Taakkulu assigalugit Siumumit naalakkersuissuuffigineqarsimasoq aamma inissinneqarumaartoq Jens Frederik Nielsen (D) oqarpoq.

Inatsisinik unioqqutitsinerunngitsoq erseqqissaatigigaa

Naalakkersuisut marluk qinigassanngortinnerisa kingorna Siumup isornartorsiuingaatsiarnera oqallisaavoq, naalakkersuisooqatigiinnullu aamma kalluaalluni.

- Isumaqatiginngilaat (Siumup aaqq. ) sassartitsisoqarsinnaasoq naalakkersuisutut atuuffeqartillutik. Kisianni aamma tunngavilersuutigaat inatsisinik uniuinerusoq. Taannalu erseqqissassuara ilumuunngimmat, naalakkersuisut siulittaasua oqarpoq.

Naalakkersuisooqatigiinniillu aninissamik tusagassiuutitigut sioorasaarineq uggornarlunilu suleqatigiinnermik pitsaasumik ataqqeqatigiinnermillu takussutissiinngitsoq taassuma ilanngullugu oqaatigaa.

Siumut naalakkersuisumik folketingimut ilaasortaatitaqarsimasoq

Naalakkersuisutut atuuffeqaatigaluni folketingimut ilaasortaatitaqarsimaneq aamma eqqaaneqartoq.

- Oqaluttuarisaaneq kingumut qiviarutsigu ullumikkut partii aamma suleqataajunnaartoq, nammineq folketingimi ilaasortaatitaqarlutik naalakkersuisunngortitsinikuupput, Jens Frederik Nielsen (D) oqarpoq.

Naak oqaluttuarisaanermi pisimasut eqqaasaqattaarsinnaagaluarlugit siumut ingerlaannarnissaq ulluni makkunani pingaaruteqartoq, partii Siumullu aalajangiussaat ataqqillugu taassuma ilanngullugu oqaatigaa.

Siumullu naalakkersuisooqatigiinnit tunuarnera USA-mut qanoq sunniuteqassanersoq aperineqarami ima akivoq:

- Nunatsinni avissaartuunneq taakkununnga (USA-mut aaqq.) nukittorsaataaginnartoq immitsinnullu  sanngiillisaataaginnartoq. Taamaammat uggornartorujussuuvoq, Jens-Frederik Nielsen (D) oqarpoq.