Donald Trumpip oqariartuutigaa nunarput USA-mut atalersinnaasoq Amerikamiutullu innuttaassuseqalersinnaasugut.

Ilisimatusarfimmi lektorimut Steven Arnfjordimut nunatta siunissaa qanoq isikkoqarnersoq KNR-imiit apeqqutigaarput.

Takorlooriarutsigu Amerikamiutut innuttaassuseqalertugut, kalaallit systemianut tamanna qanoq sunniuteqassava?

- Ajortuinnarnik isiginiartutut pigaanni, taamatullu pisoqassappat pisortatigut ikiorsiissutit tapiissutit siullertut annaassavagut. Tassalu meeqqat atuarfianni ilinniagaqarnissamullu periarfissat namminersortunngorsarneqassapput. Tassalu meqqat atuarfianniit ingerlaqqilluni ilinniarniaraanni ilinniarniartoq nammineq akiliisalertussaassaaq, peqqinnissaqarfimmillu atuineq aamma akeqalertussaassaaq, 

- Napparsimaleraanni ajoqusersimagaanniluunniit, taava nakorsiaraanni nammineq akileeqqaartariaqarpoq. Taamaalillutit siornatigornit akiliinerusariaqartalissaatit, taanna oqarpoq.

Systemimi taamak ittumi inissisimalissagaluarutta aningaasaateqarluaraanni atugarissaaraannilu ajornartorsiutaanavianngilaq, kisianni inuit ikiorneqarnissamik pisariaqartitsisut ajornartorsiornerulersinnaasut, lektorip ilanngullugu oqaatigaa.

Naggueqatigulli Alaskamiittut qiviaraanni, taakkua USA-mut atapput tamaanilu aningaasaatilissuunngikkaanni inuuniarnikkut isumaginninnikkullu atugassarititat erloqinartuusut, Ilisimatusarfimmi lektorip, Steven Arnfjordip KNR-imut oqaatigaa.

- Alaskami inuit ataasiakkaat, inunnullu ataasiakkanut tulluarsaaneq systemimi ukkatarineqarput. Inuuniarnikkut ilungersunartumik eqqugaaguit, soorlu imerajuttuullutit, nakuuserfigineqaruit pinerluffigineqaruit, angerlarsimaffeqarnak il.il. taava ikiorneqarnavianngilatit. Tassa akornissaqanngilatit.

Amerikami aaqqissuussaaneq ingerlariaqqissutaasinnanngitsoq

Nunatsinni akileraartarnerup procentia nunarsuarmi qaffasinnerit ilaanniippoq, tassami aningaasarsiat annersaat pisortanut akiliutigineqartarput, taamaalillutik innuttaasut akileraarutiminnit utertiffigineqarnissartik naatsorsuutigisarpaat.

- Naatsorsuutigisarparput akeqanngitsumik nakorsiarnissaq, akeqanngitsumik nakorsaaserneqarnissaq ilinniarnissarlu. Amerikamullu atalissagaluarutta tamakkua periarfissaalernavianngillat.

Taamaalillutik inuit ataasiakkaat namminerminni akisussaaffik tigusariaqalissagaat ilinniarneq nakorsiarnissarlu nammineq akilersinnaanngikkaanni inuup nammineerluni ajornartorsiutigissavaa. Suliffeqaraannilu ajornartorsiutigivallaarneqarnavianngilaq. Kisianni Alaskami inuuniarnerup qanoq innera ersarissumik takullugu soorlu piitsuugaanni angerlarsimaffeqarnanilu ‘sakkortoorujussuusoq’, lektorip ilanngullugu oqaatigaa.

- Taamaammat isumaginninnermi kiffartuussinermi nunatsinni atuuttut amerikamiut suleriaasiannit taarserneqarnissaat kissaatiginanngilaq, Steven Arnfjord naggasiilluni oqarpoq.

Nunarput Amerikamut atalissanersoq suli nalorninartumiippoq. Naalakkersuisulli siulittaasuata Múte B. Egedep (IA) danskillu ministeriunerata Mette Frederiksenip (S) nunarput tuniniagaannginnerarpaat.

Donald Trumpip nunarput pisiarinissaanut soqutiginnilluni 2019-imi siullermeerluni oqaatigaa, kisiannili nunarput tuniniagaanngitsoq erseqqissaatigineqarpoq. Donald Trump USA-mi præsidentitut sapaatip akunnera qaangiuppat aappassaaneerluni ivertinneqassaaq.