KNQK: Qaaqqusissummik nassiussaqanngilagut

KNR-ip Kalaallit Nunaanni Qimussertartut Kattuffiata aamma kultureqarnermut naalakkersuisoqarfiup attaveqatigiittarsimaneranni allagaatinik takunninneratigut, USA-mi illersornissamut ministerip nunatsinnut tikeraarnissanik qaaqqusissut saqqummerpoq.

Kattuffiup siulittaasua, Mikkel Jeremiassen februaarip 16-iani ima allassimavoq:

- Kalaallit Nunaanni Qimussertartut Kattuffiat sinnerlugu qimussernermik sukkaniunnissamut malinnaajartornissannut peqataajartornissannullu qaaqqusinnaanerit nuannaarutigaara.

KNR allakkap tuluttuujusup ilaanik taama kalaallisuunngortitsivoq.

Kisianni allagaq taanna kattuffiup USA-mi illersornissamut ministerimut nassiussimanngisaannarlugu, tusagassiutinut marlunngornermi unnukkut allapput.

Allakkamut missingiut naalakkersuisoqarfimmuinnaq nassiussimallugu allanullu nassiussimanngikkitsik, kattuffik nassuiaavoq.

- Pete Hegsethimut qaaqqusissut Namminersorlutik Oqartussanut nassiunneqarpoq. Namminersorlutik Oqartussaniit paasitinneqarpugut, qaaqqusissut nassiunneqarsinnaanngitsoq, taamaattumillu suliaq tassunga unitsipparput.

USA-p illersornissamut ministerianik qaaqqusinermikkut, nuna pissaanilissuup illersornissaqarfiata qulimiguuliutaanit Avannaata Qimussersua ikiorneqarsinaasoq neriussimallutik, kattuffimmiit allapput. Marloriinnik qulimiguullit, Boeing CH-47 Chinook, qimminik, qamutinik, qimussertussanillu assartuisinnaasut, kattuffiup neriuutigisimavaa.

- Erseqqissaatigissavarput ajortumik isumaqarata taperneqarnissarput akuerisimangatsigu, avannaata qimussersuup ingerlanneqarnissaa qulakkeerumallugu, kattuffik marlornngornermi unnukkaa allappoq.