Kattuffik amerikamiunut qaaqqusisuusoq
Kalaallit Nunaanni Qimussertartut Kattuffiat amerikamiunut arfininngorpat qimussimik sukkaniunnermik malinnaasussanut qaaqqusisuusoq KNR-imit maanna oqaatigisinnaavarput.
Katuffiup siulittaasua pisortatigoortumik februaarip 16-iani allassimavoq:
- Kalaallit Nunaanni Qimussertartut Kattuffiat sinnerlugu qimussernermik sukkaniunnissamut malinnaajartornissannut peqataajartornissannullu qaaqqusinnaanerit nuannaarutigaara.
Tamanna pivoq naak siulittaasup, Mikkel Jeremiassenip kattuffik qaaqqusinermut attuumassuteqanngitsoq oqaatigigaluaraa.
Nunatta karsianit tapiissuteqarfigineqartoq
Allakkat takunniffigisinnaasatta qimussimik sukkaniunneq amerikamiut illersornissamut ministerianut pisortatigoortumik qaaqqusissuteqartoqarnerata saniatigut kattuffik nunatta karsianit aningaasaliiffigineqarsimasoq takutippaat.
Kattuffik Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut qinnuteqarnermi kingunerisaanik 2024-mi 2,5 millionit koruuninik aamma 2025-mi 1,75 millionit koruuninik aningaasaliiffigineqarpoq. Kattuffiulli qinnuteqaatini marsimi tunuartissimagaa allakkat KNR-imit takunniffigisinnaasatta takutippaa. Kattuffiup 2025-mi aningaasaliissut utertissimaneraa allakkat takunniffigineqarsinnaasut takutinngilaat.
Mikkel Jeremiassen amerikamiut illersornissamut ministerianut ima aamma allappoq:
- Peqataanerit pisumut pissarsiaqarfiusinnaavoq, kisianni aamma issittumi suleqatigiinnerup taperserneqarneranut nunanut tamalaanut attaveqaammut pitsaasumut ersersitsissalluni, Mikkel Jeremiassen allakkami allappoq.
Pisortatigoortuunngitsumik tikeraarneq
Tamatuma saniatigut siulittaasup Ilinniartitaanermut, Kultureqarnermut, Timersornermut Ilageeqarnermullu Naalakkersuisoq amerikamiut illersornissamut ministerianik qaaqqusinissamut ikiuuteqqusimagaa allakkat takunniffigisinnaasatta naalakkersuisoqarfimmi pisortamut mailikkut nassiunneqarsimasut takutippaat.
- KNQK-p Siulersuisuuneri sinnerlugit qaaqqusissutissaq kakkiussamiittoq naalakkersuisoqanngikkallarnerup nalaaniinnera pissutigalugu uangullu kulturimut timersornermullu naalakkersuisoqarfiup ataaniinnerput innersuussutigalugu USA-mi illersornissamut ministeri qaaqquseqataaffigisinnaaviuk?
- Erseqqissaatigissuarput arlaannaatingulluunniit politikkimut attuumassuteqanngimmat qaaqqusiniarneq. Qulakkeerinninnissalli aqqutaani aammalu misilittakkatigut tuniooraaqatigiinnermiissalluni. Ineriartortitseqatigiinneq, atukkatigut oqilisisaassineq, il.il. ilassilluassagitit neriuutigaarput, Mikkel Jeremiassen allappoq.
Kalaallit Nunaanni Qimussertartut Kattuffianni siulittaasup saaffiginninninneq amerikami naalakkersuisunut toqqaannartumik saaffiginnissutaagaluartoq qaaqqusineq politikkimut attuumassuteqanngitsoq mailimi allakkamini allappaa.
