Kattuffik USA-mit aningaasanik pissarsisimannginnerartoq

Kattuffik Avannaata Qimussersuanik aaqqissuisoq USA-mit aningaasanik pissarsisimannginnerarpoq. ‘KNQK-p kontoanut 1kr-milluunniit ikisoqanngilaq taakkunanngaanniik’, kattuffik facebookikkut allappoq. Sermitsiamullu nalunaarutaa allaaneruvoq.

Allattoq Nicole Sander Bertelsen

marsip 23-at 2025 13:37

Nutserisoq Connie Fontain

USA-mi præsidentip tulliata nulia aamma Kalaallit Nunaanni Qimussertartut Kattuffiat imminnut attuumassuteqanngitsut, kattuffimmi siulittaasoq, Mikkel Jeremiassen Facebookikkut sapaammi ullaakkut allappoq.

- Qaaqqusarinngilarput. Ima paasivarput isiginnaarsinnaanermut periarfissaq tamanut ammasoq atorniaraa, facebookikkut allakkami allassimavoq.

Siulittaasup tamatuma saniatigut kattuffik inuiaassusitta, nunatta, kulturittalu aningaasanngortinneqarsinnaannginneranik takutitsissalluni tunuarsimaarsinnaanngitsoq allappaa.

Imminut assortortoq

Taassuma allakkamini kattuffiup kontuanut USA-mik koruuninnguamilluunniit ikisoqarsimanngitsoq erseqqissaatigaa. Kisianni, Nuummi amerikamiut sinniisoqarfik Air Greenlandimut toqqaannartumik akiliuteqarluni assartuinermut aningaasartuutit ilaannik matussusiinissamut neqerooruteqarsimanerarpaa.

- Tamanna tunuliaqutatta siulersuisuunerillu akornutissaqartinnagu akuerinikuuaat, taamaaliortareermatami, Mikkel Jeremiassen oqarpoq.

Kisianni taassuma kattuffik Nuummi sinniisoqarfik aqqutigalugu USA-mit aningaasanik pissarsisimasoq sapaammi ullaap tungaani Sermitsiami ilanngutassiami uppernarsarpaa.

Kattuffilli qanoq annertutigisumik aningaasaliiffigineqarsimanersoq Sermitsiamut paasissutissiissutiginngilaa.

- Isumaqatigiissut malillugu oqaatigisinnaanngilakka, kisianni annertulaarput, Mikkel Jeremiassen tusagassiorfimmut oqarpoq.

KNR-ip Mikkel Jeremiassen oqaaseqartinniarsaraa taassumali saaffiginnissuterput uterfiginngilaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.