- Alaskap Kalaallit Nunaatalu assigiinngissutaasa annerpaartaraat, uagut Nunarput nammineq oqartussaaffigigatsigu. Alaskami naggueqatitta nunartik oqartussaaffiginngilaat annaasimallugulu, taanna oqarpoq.

ICC-mi siulittaasuusimasoq, Aqqaluk Lynge Donald Trump Juniorip Nuummut sapaatip akunnerata siuliani tikeraarnerata kingunerisaanik KNR-ip pulaarmagu taama oqarpoq. Alaska USA-mi naalagaaffiuvoq, Issittumiillunilu.

Aqqaluk Lynge issittormiut pillugit ukiorpassuarni suliaqarsimavoq, taassumalu nunatsinni ukiut ingerlanerani allanngoriartornerujussuaq maluginiarsimavaa.

Donald Trump Juniorilli tikeraallatsiarnera nunatsinnut iluaqutissartalimmik malitseqassanersoq apeqquterujussuartaqarpoq.

Aqqaluk Lyngellu tamanna pillugu naliliinera qiimmassaataanngilaq:

- Ajoqutai ajornerujussuupput takujumaarpagut ulluni aggersuni aammalu præsidentinngoreerpat pisut qanoq ikkumaarnersut. Ilaa nalinginnaq diplomati atorlugu suliaqartuunngillat taakkua, kisiannili Facebookkikkut allatigullu nuannarineqarneq atorlugu ingerlatsisuugamik, taanna oqarpoq.

Taamaammat naak Trumpip ernera Trump Force Onemut ilaalluni Floridamut uteqqereeraluartoq Trumpikkut ilaqutariit puigussanngikkivut Aqqaluk Lynge isumaqarpoq. Trumpimut atatillugu sissuiinnartariaqarpugut:

- Isumaqarpunga ima pissutsit allanngortigisut siornatigumut naleqqiullugu, sissuinngikkutta uagut oqartussaassuserput sapangissinnaagipput imaaliallaannaq.

Politikkikkut sikorlaamiinneq

ICC-mi ukiorpassuarni siulittaasuusimasup issittormioqatitsinnut sanilliulluta sunniuteqarnerullutalu oqartussaassuseqarnerunerput eqqaamasariaqaripput aamma erseqqissaatigaa.

- Nunatsinni aaqqissuussinerput allat issittormiut aaqqissuussaannut naleqqiullugu pitsaanerpaavoq. Nunatsinni inuiattut immikkooruteqartutut akuerisaasimavugut, aamma nammineq oqartussaaffigaagut pisuussutigut, aalisakkat piniakkat aammalu aatsitassat. Kiisalu aamma nammineq danskit peqatigalugit siunissarput aamma aalajangersinnaallugu qanoq ittuussanersoq.

Nunarput USA-mut ilanngutissagaluarpat Namminersornerulernitsinniit angusimasat annaasinnaagivut ilanngullugu oqaatigaa:

- Kiffaanngissuserput taamaallaat pigaarput naalagaaffeqatigiinnerup iluani taanna eqqarsaatigisassaavoq. Naalagaaffeqatigiinnerumuna iluani taanna pilluta, pilluta angusimasarput ullumikkullu kiffaanngissuserput imaaliallaannaq allanngorsinnaavoq soorlu Trump siorasaarereersoq.

Taamaammat piffissaq aggersoq pillugu mianersorlutalu eqqarsarluassasugut, Aqqaluk Lynge isumaqarpoq:

- Sikumi sikorlaami toortarluanngikkaanni aqqutissaq ajorsinnaavoq, massakkullu sikorlaamiippugut politikki eqqarsaatigalugu suna tamarmi imaattorsinnaavoq.

Donald Trump USA-mi præsidentit 47-ssaatut januaarip 20-anni ataasinngornermi ivertinneqassaaq.