- Ilulissaniit Qaanaamut nunaqarfittai tamaavimmik ilanngullugit kommuunip illuutai aserfallassimaqisut kia sulissutigerusuppai?

Avannaata Kommuniani qinersisartunut ataatsimiititsinermi, Qaanaameersoq, Korna Isaksen Nielsen taama apeqquteqarpoq.

Attartortut piginnittunngortillugit

Kommunillu illuutai aserfallakkiartornerminni nutarterniarneqartarnerinut malinnaasoqarpianngimmat, kommunep illuutaasa attartortunut tunniunneqarnissai aaqqiissutissaasoq, kommunelu nutaanik sanaartortariaqartoq, Qullermeersoq, Erik Lange isumaqarpoq:

- Inillu kommunep pigisai massakkut akittoraluttuinnartut innuttaasunut tunniukkutsigit immaqa peqqissimissutigiunnanngilaa kommunep aamma tamanna.

Aserfallatsaaliinerlu kommunit katiterneqarnerannit kinguniperluutit ilagigaat, Naleqqameersoq, Jens Napaattooq isumaqarpoq:

- Nunaqarfinni sanaartorneq ukiorpassuarni uninngaannanngilaq,  kisianni aamma aserfatsaaliineq kommunep tamakkiisumik kivissinnaanngisaa kommunerujussuit ilutigalugit.

Taanna oqarpoq, namminerlu illuliorsinnaanerit ajornannginnerulersinneqarnissaat aaqqiissutissatut oqaatigalugu:

- Naleqqamiit ilungersuutigivarput nunaqarfinni nammineq illuliarineqartartut 95-5, qanoq iliuuseqaqqittariaqaleratta isiginngitsuusaaginnarsinnaanngilagut.

Nutaanik sanaartortoqartariaqartoq

Ineqarfinnillu aserfallatsaaliineq akisusarmat, nutaanik sanaartortoqartariaqartoq, Siumumeersoq, Lars Erik Gabrielsen isumaqarpoq:

- Aserfallatsaaliisoqarsinnaavoq, kisianni kialuunniit ilisimavaa  aserfallatsaaliineq immini akikitsuuneq ajortoq. Nutaanik sanaartorneq avaqqussinnaanngilarput.

Demokraatineersoq, Lena Ravn Davidsen tamatumunnga isumaqataavoq:

- Aaqqingallarnerpassuit piunnaarlugit, aaqqissuisaqattaarnersuit piunnaarlugit isumaqarpunga aningaasat pitsaanerusumik atussappata inissianik nutaanik sanaartorneq aallartittariaqartoq.

Kommunilli katiterneqarnerisa kingunerisaanik inoqarfinni aserfallatsaaliinerit sanaartornerillu ingerlalluarnerulertut, Atassummeersoq, Knud Kleemann erseqqissaavoq:

- Nunaqarfiit allat ukiut siuliini qiviarneqarnikuusimanngitsut aatsaat ukiuni sisamani kingullerni sanaartorfigineqarlutik aallartipput.

INI A/S suleqatigalugu sanaartortoqarnissaa tullinnguummat, sanaartornerup siuariartunnginneranik oqartoqarsinnaanngitsoq, taanna oqarpoq:

- Aamma tullinnguutissuagut ukua kommunep illuutai, INI A/S suleqatingalugu. Taamaammat oqartoqarsinnaanngilaq sanaartortoqanngitsoq, imaluunniit kommunep illuutaasa aserfallatsaalinissaanut.

Avannaani inissaaleqineq

Avannaanilu inissaaleqisut ikigisassaanngimmata, taakku aamma oqaluuserineqartariaqartut Lena Ravn Davidsen isumaqarpoq:

- Taassuma saniatigut aamma Avannaata Kommuniani inissaaleqisut 744-t aamma eqqartorneqartariaqarput, taakkunani illoqarfinniinnaq eqqartorneqarput. Nunaqarfiit inissarsiornerat suliluunniit eqqartorneqarani, taamaattumik sumiiffinni tamani inissianik sanaartorneq aallartinneqartariaqarpoq.

Attartortullu pisinnaatitaaffii pillugit inatsisit nutarsarneqarnerisigut aserfallatsaaliineq ingerlanneqarsinnaasoq, Inuit Ataqatigiinneersoq, Bendt. B. Kristiansen isumaqarpoq:

- Attartornermi piginnaatitaaffiit eqqarsaatingalugit kommunalbestyrelse oqinnerusumik piginnittuusutut attartortitani aaqqissuussinissaanut inatsisit tulluussarneqartariaqarput. Inatsisit piupput allanngortinneqarsinnaallutik.