Kommuninut qineqqusaarneq naammassiartortillugu sakkortusiartorpoq – Kommuneqarfik Sermersuumilu oqallinnermut sunniuteqartumik maanna siunnersuuteqartoqarpoq.

Siumup borgmesterinngortikkusutaa, Martha Abelsen, qinersinerup kingorna borgmesterinngussagaluaruni politikkikkut oqartussaaneq tamatigut allanngortikkusuppaa.

Politikkikkut oqartussaaneq pingaartumik Paamiunut Tasiilamullu siammarterneqassasoq taanna isumaqarpoq.

- Borgmesteri illoqarfimmi kisimiilluni oqartussaassuseqartuuvoq. Illoqarfinnilu sinniisut oqaasissaqarsimanatik. Siumumit tamanna avsiammarterniarparput.

Borgmesterip sumiiffinni tullersortai

Martha Abelsenip borgmesteritut oqartussaaffik borgmesterip tullersortaanut marlunnut Paamiuni Tasiilamilu inissisimasussanut avikkusuppaa.

- Kommunalbestyrelseqassaaq, borgmesterimit tassungalu tullersortaasunit marlunnit, aappaa Tasiilami aappaalu Paamiuni inissisimasussanit, aqunneqartumik.

Tassami politikerit sumiiffinni (isorliunerusuni, aaqq.) qinikkat sumiiffinni politikkikkut aqutsineq pineqartillugu naammattumik oqartussaassuseqanngitsut, bborgmesterinngorusuuttoq isumaqarpoq.  

- Kommunip aaqqissugaaneranik naliliinerit tamarmik naammassineqarsimasut tamatta ilisimavarput. Naliliinerup sumiiffinni ataasiakkaani politikkikkut oqartussaanerup amigaatigineqarnera takutippaa. Oqartussaaffeqarsimasut qitiusumiititsisimapput, pissaanerlu kommunalbestyrelsimullu qinikkat sinnerinut agguataarsimanagu.

Sumiiffinni qanoq oqartussaappat?

- Pissaanerup katitigaanera, sumiiffinni qinikkat oqaasissaqartitaaffiginngisaat, borgmesterip tulleqarlsinnaavoq siullermik tulianillu.  Taana allannguut ingerlatsinermut inatsit aqqutigalugu pilersissinnaavarput.

Sumiiffinni qinikkat politikkikkut qanoq oqartussaanissaat borgmesterimut qinigassanngortittup itinerusumik akinngilaa.

Avaaraq Olsenip (IA) Kommuneqarfik Sermersuumi borgmesteriunermini siammarterinissamut suliniuterpassuaqareertoq – suliarli aamma suli naammassinngitsoq, oqaatigaa. Suliniutillu atuunnermini kingusissukkut aatsaat atuutilerput, taakkulu innuttaasunit suli malugineqanngippata paasilluarsinnaavaa. Assi © : KNR / Markus Valentin

Siammarterilereersut

Maanna borgmesteriusup, Avaaraq S. Olsenip (IA) oqarnera naapertorlugu suliniutinik oqartussaaffeqarnerunermik akisussaaffimmillu Nuummiit kommunip sinneranut siaruarterinermik nammineq kommunalbestyrelsillu suliniuteqareerput.

- Kommunip ataatsimoortinnissaanut suliaqangaatsiarpugut. Kommunerujussuartut, aaqqiissut tassa suut tamarmik maani aalajangerneqarnissaat, isornartorsiorneqangaatsiarnikuuvoq. Tamanna paasisinnaavara. Uanga nammineq illoqarfeeqqameersuuvunga, illoqarfiillu pingaarnerunerusup eqqarsaatigineq ajoraatigut paasisimallugu, taanna oqarpoq, erseqqissaallunilu:

- Akisussaaffiit ilarpassui tunumut Paamiunullu siammasinnerulersillugillu aningaasaqarnermut akisussaaffeqarnerulersitsivugut, tassa sumiiffinni immikkut pisortanik nutaanik atorfinitsitsilluta. Aalajangiinerit tamarmik Nuummiinnissaat isumassaqanngilaq.

Avaaraq Olsenip siusinnerusukkut iliuuserineqartarsimasoq innersuusssutigaa, assersuutigalugu Sermiligaami majuartarfiliortoqassagaangat Nuummut sianerluni akuersissuteqartitseqqaartoqartaraluarpoq. Atorfiilli nutaat atorlugu tamanna siunissami allanngortinneqassaaq.

- Iluarsartuussinissamut 50 millioninik agguataarivugut, taakku Nuummit aqunneqartaraluarput. Tamanna allannguiffigaarput, taamaalilluni nunap immikkoortuani immikkoortortaqarfinnilu pisortat taakkuninnga suliaqarsinnaalersillugit, taanna oqarpoq.

Tamatuma sanitigut Ittoqqortoormiini illoqarfimmi suut tamarmik ataatsimut tassannga isigineqarsinnaatilerlugit illoqarfimmi aqutsisumik pilersitsisoqarpoq, ingerlatsiviillu aalajangiinissamut tassunga saaffiginnittassallutik.

Avaaraq Olsenilli naak nutaanik suliniuteqartoqaraluartoq innuttaasut allannguutinik suli maluginnissimanngippata paasisinnaalluarpaa.

- Atorfiit nutaat januaarimi aatsaat inuttalerneqarput. Ungasinngitsukkut pivoq, inuillu allannguut suli malugisinnaanngilaat. Qinersilernerput uggornartorujussuuvoq, taakkumi aallartisalereerput. Illoqarfimmut periusissialiornikuuvugut. Maanna Paamiunut, Tasiilamut Ittoqqortoormiinullu atatillugu ineriartortitsinissamut periusissiussaagut.

Teknikkikkut aaqqiissuteqarnissamut tunnganngitsoq

Aqutsinerup siammartersimanera Martha Abelsenip ilumoornerarpaa. Tamannali taassuma isornartorsiunngilaa. Taassumami innuttaasut politikkikkut pissaaanerup allanngortinnissaanik kissaateqarnerat ukkataraa.

- Suliniutigineqartut politikkimut attuumassuteqanngillat. Uanga politikki kommunalbestyrelsilu oqaluuseraakka. Innuttaasut –illoqarfinni borgmesterit najugaqarfiginngisaani politikkikkut aamma siammasinnerusoqarnissaa naliliinerni tamani kissaatigaat. Siammasinneq taanna Siumumit pilersinniarparput, taamaaliornikkut oqartussaaneq agguaanneqassalluni.

Martha Abelsenip ingerlatsinermut inatsit malillugu aningaasaqarnermut ataatsimiititaliamik taamaallat pilersitsisoqartussaanera innersuussutigaa. Tamatuma kingorna kommunalbestyrelsip kommunip aaqqissugaaneranut aalajangiisussaanerarpaa.