- Avissaassagaluarutta sumut illoqarfimmut atarusunnerluta pineqarsinnaanerluni?

Atammimmiu, Erneeraq Poulsen, qineqqusaartunut taama apeqquteqarpoq.

Illoqarfinni arlalinni innuttaasut kommuniminniit avissaarnissamik kissaateqarlutik nalunaartarnikuupput.

Kommunit maannakkutut aggorneri politikerit neriuutigisaattut pitsaasuungillat.

Allaffissornermut aningaasanik atuinikinnerunissaq aalajangigassallu inunnut qanittumi, tassa kommunini, aalajangerneqartarnissaat takorluugaangaluarpoq.

Tamannali iluatsissimanngitsoq, kommunit aaqqissuussaaneranik naliliinermi qanittukkut allaaserineqarpoq.

Innuttaasut naammagisimaarinnginnerat ernumanartoq

Kommunit sullissinerannut innuttaasut naammagisimaarinninnerat appaseqisoq, tamannalu isumakulunnartuusoq, naliliinermi inerniliussaavoq.

Maniitsumi imnnuttaasut Qeqqata Kommunianiit tusaaneqanngitsutut misigisimagamik avissaarusullutik siorna atsioqatigiitsiterput.

Kommunilli aggulunneqassappata, nunaqarfik kommunimut sorlermut atalerusunnerluni toqqaasinnaanissaminut pisinnaatitaaffeqartariaqartoq, Naleqqameersoq, Lars K. S. Olsen isumaqarpoq:

- Uanga isumaqarpunga agguluttoqassappat, Atammik uani assersuutissatsialaavoq. Sorlermiikkusuppat, isumaqarpunga Atammimmiut nammineq aalajangissavaat.

Lars K. S. Olsen taama oqarpoq.

Inuit Ataqatigiinneersoq, Krister Støvlbæk tamatumunna isumaqataavoq:

- Uagut isumaqarpugut namminneq aalajangiisinnaassasut kommune sorlermut atalerusussanersut. Taanna innuttaasut pisinnaatitaaffigigamikku. Isumaqarpunga nunaqarfiup nammineq aalajangersinnaasariaqaraa.

Tamannali partiinit qinerneqartunit oqaluuserineqartariaqartoq, Siumumeersoq, Abel Enoksen isumaqarpoq:

- Partiit tamattaalluta oqaloqatigiissutigiumaarparput, partiit isertussat, qanoq isikkoqartillugu suliarineqarumaarnersoq.

Nunaqarfimmioqatigiillu tamarmik isumaqatigiilutik kommunimut sorlermut atarusunnerat qulaajarneqartariaqartoq, Qullermeersoq, Henrik Fleischer oqarpoq:

- Isummat assigiinngitsuusaramik, Atammimmiut tamarmik taama isumaqarnerlutik? Tassa tamakku qulaajagassat.

Kommunillu aggoqqinnissai anguniagaralugu, innuttaasulli aalajangeeqataasariaqartut, Demokraatineersoq, Erne Olsen oqarpoq:

- Kommunit aggoqqinnissai anguniarparput. Kommunit avinneqarniaannarlutik avinneqassanngillat, innuttaasut aamma aalajangeeqataasussaapput.

Kommuneqarnerup aaqqissuussaaneranik naammagisimaarinninngittuni Qeqqata Kommunia kisiartaanngilaq. Avannaata Kommunia Kommune Kujallerullu kommuneqarnerup aaqqissuussaanerisa misissoqqinneqartariaqarneri kissaatigaat.