Nanortalimmi aqqusinikkut pisorujoorluni akerleriissuteqartoqarnarsorinanngikkaluarpoq. Namminiilivinnissamut pikititsinerup nunatsinni illoqarfiit anginersaata aqqanilissaanni innuttaasunut misillertitsivoq.

Nanortalimmi nunaqarfiinilu innuttaasut 1500-niit 800-t missaanut amerlassusillit qaammat kingulleq atsiornernik katersisoqarnerani atsioqataapput. Anguniagarlu erseqqippoq - Nanortalik Kommune Kujallermiit avissaassasoq namminerlu kommuninngoqqilluni.

Qineqqusaartoqarnerani Kommune Kujalleq isornartorsiorneqangaatsiarpoq. Pingaartumik isumaginninnermut immikkoortortaqarfik oqallisaavoq, tassami pinngitsaaliissummik arsaarinninnerit amerleriarujussuartut, isumaginninnermi siunnersortit suliaat amerligaluttuinnartut pissutigalugit immikkoortortaqarfiup kivinnissaanut kommuni Namminersorlutik Oqartussanut ikioqqusariaqarsimapput.

Peter Asmussen Kommune Kujallermiit avissaarnissamut illersortaavoq. Taassuma illoqarfiup ineriartoqqilernissaanik pilersitsisinnaassasoq neriuutigaa.

Ineriartunngitsoq

KNR-ip Peter Assersen Nanortalimmi aqqusinermi naapippaa. Taassuma Kummune Kujallermi aqutsisut ingerlatsisimanerannut naammagittaalliornini isertuanngilaa.

- Kommune kujallermit avissaarnissaq aamma isumalluutigineqarpoq. Pissutigivarput Nanortallip ineriartornera uninnukuummat, aaqqissuussarpassuit kommunip suliassai amerlavallaaqimmata, taanna oqarpoq.

Illoqarfimmi eqqaanilu pingaartumik inuusuttut Peter Assersenip eqqarsaatigivai. Namminiilivissagaluaruttami taakku ukkatarineqarnerulernissaat neriuutigivaa.

Avissaarnissaq Nanortalimmut nunaqarfiinullu iluaqutaassaoq Emilie Petrussen aamma isumaqarpoq: - Isumalluutigivara tassa taamaakkusunnarpoq. Naammatsinnarami uagutsinnut.

- Avissaarsinnaassagutta qujanassagaluaqaaq. Soorlu maaniittut inuusuttavut eqqarsaatigalugit arlalitsigut pitsanngorsaanissaq pisariaqarmat, Peter Assersen naggasiivoq.

Emilie Petrussen assinganik neriuuteqarpoq. Avissaarnissaq utaqqineqaannarsinnaajunnaartoq taanna isumaqarpoq.

- Pisariaqarteqaarput. Naammatsippugut.

Inukillisaaneq unitsilli

Augustinus Augustinussenip kommunimut naammagittaalliornini KNR-imut aamma oqaluttuaraa.

Kommune Kujallermiit avissaarnissap ilorraap tungaanut saatitsissasoq, Peter Assersen assigalugu taanna aamma isumaqarpoq.

- Kommune Kujallermiit avissaassagutta, nanortallillu kommuneanut utissappat isumalluarnaqaaq. Atugassarititaasut pitsaanerulernissaat naatsorsuutigigakku.

Atugassarititaasut suusinnaappat?

- Soorlu immaqa nunaqqaterput Nanortalimmiinnikoq imaassinnaavoq uteqqeriataartoq. Taavalu atorfiit kommuunit iluanni nunaqavissunit maanimiunik immaqaluunniit avataaninngaanniit tikilllutik maanga atorfinikkiartornissaat.