Qaqortormiut Campus Kujallermi sapaatip akunnerata siuliani katersuupput, tassanilu kommunimut qineqqusaarneq KNR-ikkut aallakaatitaq oqallinneq ingerlanneqarpoq.

Kommune Kujallermi qinigaaffik kingullermi isumaginnittoqarfik sammineqartorujuuvoq – tamannalu oqallinnermi aamma qaqinneqarpoq.

Meeqqat pinngitsaalisamik aarsaagaasarneri amerlavallaat qanoq pinaveersaartinneqarsinnaanersut politikerinit oqaluuserineqarpoq.

Arsaarinnittarneq akiorlugu

Ilaqutariillu pisariaqartitallit oqaloqateqartarnissaat pingaaruteqartoq, Naleqqameersoq, Aggu Bentzen oqarpoq.

- Oqaloqatiginnittartumik oqaloqatiginnittussaapput. Angajoqqaat katsorsarneqartarnissaat ataavartumik, tassa taakku pingaarnerpaapput.

Qanimullu sullissisoqarnissaa pisariaqartoq, Demokraatineersoq, Karen Jakobsen isumaqataalluni oqarpoq:

- Taanna mumisissagutsigu ilaqutariinni siunnersortit qanimut ilaqutariit sullinneqartariaqarput, ilaqutariit nukittuut nunatsinni pisariaqartippagut.

Meeqqallu allamut inissinneqartarneri akiorniarlugu oqaloqatiginnittartut angalatillugit aaqqiisoqartariaqartoq, Qullermeersoq, Ole Jørgen Davidsen oqarpoq.

- Angajoqqaat oqaloqatigineqartariaqalerput. Angalaartillugit, siunnersortit pikkorissut atorfinitsillugit, asuli meeqqanik taamatut arsaartuineq inuiaqatigiinnut qanoq naleqaleramik.

Aanngajaarniutit pissakinnerlu

Ole Jørgen Davidsen taama oqarpoq, aanngajaarniutillu oqaluuserineqartariaqartut oqaatigaa:

- Pissutsit tamakku qaangerneqassappata ikiaroornartoq naaggarluinnartariaqalerparput. Imigassaq qanoq isummerfigineqarnersoq, taamatut ingerlatsineq inuiaqatigiinnut akisuallaaleqaaq.

Meeqqat allamut inissinneqartarnerisa pinaveersaartinnissaat, Inuit Ataqatigiinneersut, Aviaaja Sandgreen aamma Mouritz Karlsen isumaqarput.

Naligiissitaanerulernerlu ajornartorsiummut aqqutaasinnaasoq, Atassummeersoq, Kristine Johanne Høegh oqarpoq:

- Meeqqat avataanut inissitat pissakinnerminngaanniit aamma aallaaveqarpoq. Suameeraarakasik angajoqqaaq akissarsisarpoq, imigassaannaanngilaq. Pissakittuupput. Soorunami ikiaroornartoq imigassarlu apeqqutaapput, kisianni aamma naligiisitaannginneq angivallaarujussuarpoq.

Patajaanneq, suliffiit amerlanerit

Kommune Kujallip aningaasaqarnikkut ajornartorsiornera oqallinnermi oqaluuserineqartut ilagaat.

Suliffissanillu pilersitsinikkut meeqqat pilersorneqarnerusinnaasut, Siumumeersup, Jakob Noahsenip oqaatigaa:

- Suliffissat pilersinneqassapput. Aningaasaateqanngikkaanni meeqqat pilersorneqarsinnaanngillat. Inimut akiliisoqarsinnaanngilaq, angerlarsimaffeqartoqarsinnaanngilaq.

Ingerlalluartorpassuilli ajornartorsiummut kivitseqataasariaqartut, Siumumeersoq, Karla E. Bisgaard isumaqarpoq:

- Inuppassuaqarpoq ingerlalluartunik, aamma taakkuupput ukununnga sanngiinnerusunut kivitseqataasussat. Siusinnerpaarpaakkut iliuuseqartarnissaq socialpolitikkimi anguniakkatsinni qitiussooq. Siusissukkut iliuuseqarneq suliani suniluunniit, meeraannaanngittuni.