Mette Frederiksenip partiit siuttui taperserai
‘Kalaallit Nunaata siunissaa kalaallinit namminneq aalajangerneqassaaq.’
Oqariartuut arlaleriarlugu oqaatigineqareerpoq, maannali aamma uteqqinneqarpoq. Danskit ministeriat, Mette Frederiksen facebookikkut allakkamini nunatsinni partiit siuttuisa Trumpip nunatsinnik tiguaanissaminik kingullermik nalunaaruteqarneranut akerliliillutik ataatsimut tallimanngormat nalunaarutaannut tapersiilluni uteqqiivoq.
‘Uanga aamma taama iliorniarpunga’, taanna oqarpoq.
‘Danmark nunaavoq mikisoq. Naalagaaffeqatigiilli nunarsuarmi inissisimanermini angisuuvoq. Nunarsuarmi malittarisassanik atuutsitsinerup pingaaruteqassusianut nunarsuup takussutissiaani angisuuneq mikisuunerluunniit apeqqutaanngilaq’, taassuma allagaani allassimavoq.
'Suleqatigut qilaap nunallu akornanni sunik tamangajannik suleqatiginiarpagut. Nunarsuarmi ilaaffitsinni iliuuseqarnerunissatsinnut kajumissuseqartuaannarpugut. Kisianni killeqarfigut ataqqineqassapput. Nunatta killeqarfiisa innarligassaannginnerat ataqqineqassaaq. Aamma kalaallit inuit ataqqineqassapput,' Mette Frederiksen isumaqarpoq.
Sapaatip akunnerata naanerani Trumpimut akerliussutsimik takutitsineq ‘naammaqaaq’-mik oqaasertalerneqartoq aaqqissuunneqarpoq. Sisimiuni Nuummilu inuppassuarnik peqataaffigineqarpoq. Nunatsinni partiini qinigaanerpaami, tassa Demokraatini siulittaasoq, Jens-Frederik Nielsen peqataasunut ilaavoq.
