Politiit ullormut nalunaarutaat: Ukiukitsut marluk biilimik tillinnermik kingorna ajutoortut

Nuummi Nuussuartaani ukiukitsut marluk biilimut allamut apornerminni ataasinngornermut ullaaralaannguakkut nalunaaqutaq sisamat qeqqarluinnalertoq ajutoorput.

Kalaallit Nunaanni Politiit pigaartuisa pisortaat Karl Sværd taama oqarpoq.

- Ajutoornermi ajoqusertoqanngilaq ukiukitsulli taakkua marluk unnerluutigineqassapput naleqquttumillu pineqaatissinneqassallutik, politiit pigaartuisa pisortaat oqarpoq.

Unnerluutigineqarnerisa saniatigut isumaginnittoqarfimmut nalunaarutigineqarput, ukiukitsummi tassani pineqarmata, Karl Sværd oqarpoq.

Biilimik piginnittoq akiligassinneqartoq

Ukiukitsut taakkua marluk biilimik Nuussuup ilaani unnuami tillipput, politiit pigaartuisa pisortaat oqarpoq. Biilimik piginnittup biili parnaarnagit matuersaatai atatiinnarsimavai. Taamaammat biilimik piginnittoq aamma akiligassinneqassaaq.

Ukiukitsut taakkua qassinik ukioqarnersut politiit pigaartuisa pisortaata kaleeriutiginngilaa, taakkuali politiinit ilisimaneqartuusut oqaatigaa.