Poul Petersen Demokraatit sinnerlugit qinigassanngortittoq nutaarsiassaqartitsiviup Sermitsiap sapaatip akunnera aallartittoq Kommuneqarfik Sermersuumi borgmesteritut qinigassanngortittoq allaaseraa.

Tamannali paatsooqatigiinneruvoq.

KNR-imit tusagassiortut ilaasa qinigassanngortittoq aperimmagu akissutaa allatut nipeqalerpoq.

Qineqqusaartoq paatsoorneqartoq

Demokraatit sinnerlugit borgmesteritut qinigassanngortippit?

-Tamakku mianersuullugit isigikkit. Allaaserisaq amerlasuunit paatsoorneqarpoq kisianni, ilaanni taama paatsoortoqartarpoq.

-Borgmesterissamik qinersinerunngilaq, kommunemili qinersineruvoq, aamma politikkitsinnik ersersitsiniaaqqikkusuppunga suullu tunngavilersuutiginerlugit nassuiaatigalugit, Poul Petersen taama KNR-imi tusagassiortumut akivoq nangillunilu:

-Akisussaaffik tassaniilissappat -tassa Demokraatinit borgmesterinngortitsisoqassappat-, piareersimaffigaarput. Tamannali pineqanngilaq ajoraluartumillu qassiiliutinngorpoq, Poul Petersen erseqqissaavoq.
 

Amerlasuut maanna isumaqarput illit Demokraatit sinnerlugit borgmesterinngornissamut qinigassanngortittutit, sooruna taama isumaqartoqartoq? Tamanna eqqortuua?

-Qinersisussat tatigaluta taama isumaqarpata, Demokraatinit akisussaaffik piareersimaffigaarput, partiimilu tamanna eqqartoratsigu tulluarnerpaassangatinneqartunga ersersitsisoqarpoq.

Tassa Borgmesterinngorusullutit qinigassanngortippit?

-Qinersisussat tatigaluta taama isumaqarpata, Demokraatinit akisussaaffik piareersimaffigaarput, partiimilu tamanna eqqartoratsigu tulluarnerpaassangatinneqartunga ersersitsisoqarpoq.

Taasisut amerlassussaat apeqqutaapput

Qinigaanerpaassangavit? Qinigassanngortittut allat soorlu Nivi Olsen imaluunniit Justus Hansen ilinnit qinigaanerussangatippigit?

-Kinaluunniit ajugaagaluarpat qinersineq ajunngitsumik ingerlanissaa neriutigaara. Nivi imaluunniit Justus amerlanerussuteqaraluarpat ajortuunngilaq, tamannali itinerusumik eqqarsaatiginngilara.

- Allannguinissamut suleqataasinnaallunga isumaqarama, Kommunimut qinersinermi qinigassanngortippunga. Qinersisussat aalajangissavaat anguniakkakka tapersernerlugit, aamma kina piukkunneraat qinersisartut aalajangigassarimmassuk, annerusumik oqaaseqarfigisinnaanngilara.

Nivi, Justus allaqqinnaarluunniit ilinnit qinigaanerugaluarpalluunniit illit borgmesterissatut partiimi Demokraatit qinerpaatit? 

-Taanna pillugu aalajangiissaagut oqaluuseralugulu.  Aallartiffipput aalajangiusimaneqarmat,  massakkut tassunga tunngasuinnaagallartut oqaatigisinnavakka, Poul Petersen apeqqarissaarneqarnermi taama akivoq.