Atuakkiortut ersinartunik oqaluttualiortut: ''Malersussavakkit''

''Kolligiep najornera sivitsoriartortillugu misigisat eqqumiitsut misigisapilunngoriartorput, ersigineruleriartorpakkalu.''

24-nik ukiullip Gertrud-Marie ”Kiitu” Kreutzmannip oqaluttualiaa atuakkami saqqummeqqammersumi Misigisat Eqqumiitsuni ilaatigut taama allassimavoq.

Taanna Allatta!-mut inuusuttut allakkusussusaannik patajaallisaanissamut siunertalimmut peqataasut arfiniliusut ilagaat.

- Nuannertorujussuuvoq upperiuminaallunilu oqarnittuut aatsaat uppernarseqqammerpara atuakkamik saqqummersitseqataallunga, taavalu inuit atuariaannaangaat, annertoqaaq misigisaq.

Kiitup atuakkioqatigai, Nialiannguaq Simigaq, Pilunnguaq Karlsen Kristensen, Nivi Mathiesen, Pipaluk Nathansen aamma Ea Hoffmeyer.

Allatta!-p ''oqaluttualiat ersinartut'' ukioq manna qulequtaritippaat Kiitullu oqaluttualiaminut ''Malersussavakkit'' qulequtsiuppaa.

- Taassumap imarivaa arnaq inuusuttoq GUX-eeqqaammersoq nammineq kolligiataaqqammersoq aatsaat nammineeerluni misilileraa. Nammineq initaarami misigisaqaqattaalerpoq. Soorlu oqimagertarluni, taakku oqimagertarnini isertuunniarsaralugit qimarratigalugit.

Atuakkiortullu nammineq ersigisani aallaavigalugit oqaluttualiorpoq.

- Ersitoorujussuuvunga, taamaammat una allakkakku imminut ersitillattaarlungalu pinikuuvunga. Kisianni ersinartulikkersaattoqaraangat peqataasarpunga.

Atuakkioqqissamaalerpoq

Allatta!-p NAPA aamma Kalaallit Atuakkiortut suleqatigai.

Atuakkiorneq qanoq nammineq misiginerluni oqaasertaliineruvoq pikkunartoq aamma kulturimik paasisimasaqarnerulluni, piginnaasallillu taakku tapersersorneratigut atuartartut aamma inuusuttut immikkuullarissumik isiginneriaasiisa akornanni itinerusumik attavileeqataarusuppugut.  

Naak Kiitu atuakkiaqqaamminik saqqummersitseqqammeraluarluni suli pilersaaruteqarpoq.

- Tullissaa eqqarsaatigikannereerpara atuakkiaaqqat arlallit. Tamaattumik allaqqissinnaallunga immaqa inuit assigiinngitsut oqaluattuaat katersoriarlugit taakku  isumassarsiorfittut atorlugit qanorpiaq suli naluara kisianni neriuppunga piviusunngorumaartoq.