Kalaaleq atuakkiortoq Nunat Avannarliit atuakkiortunut nersornaasiuttagaannut innersuunneqartoq

Naqqiut: Kathrine Rasmussen Kielsen Nuummi maanna najugaqartoq siusinnerusukkut allappugut, tamannali kukkunerummat naqqiuteqarpugut. Tassa Viborgimi maanna najugaqarpoq.

Atuagaq ”Qivittuissuit Akornanniinnikuuvunga” nunatsinni nuannarineqarluarpoq.

Atuagarlu taanna nunanit tamalaanit nersorniarneqartunut ilanngunneqarpoq, ”Qivittuissuit Akornanniinnikuuvunga”-mimmi atuakkiortoq, Katrine Rasmussen Kielsen, Nunat Avannarliit atuakkiortunut nersornaasiuttagaannut 2023-mi innersuunneqartunut ilannngunneqarmat.

Nunat Avannarliit suleqatigiiffiat, Nordisk Samarbejde, tusagassiuutinut taama nalunaarpoq.

Nunat Avannarliit nersornaasiuttagaannut innersuunneqartut katillutik 14-iusut suliaat soorlu oqaluttualiaapput, oqaluttuaapput, allaatigisaapput taavalu taallat katersugaapput.

Katrine Rasmussen Kielsen Paamiuni inunngorlunilu peroriartortuusoq Viborgimi Jyllandimiittumi maanna najugaqarpoq. Taanna atuakkanik sisamanik saqqummersitsinikuuvoq.

Atuagaq “Qivittuissuit Akornanniinnikuuvunga” inuup asimi kiserliorluni inuunermini misigisaanik oqaluttuaavoq.

Inuk “Qivittuissuit Akornanniinnikuuvunga”-mi misigisalersaartuusoq tunuarmat atuagaq taanna malitseqartinngiinnarniarlugu, atuakkiortup Katrine Rasmussen Kielsenip siusinnerusukkut nalunaarutigaa.

Nunat Avannarliit atuakkiortunut nersornaasiuttagaannut ukioq manna innersuunneqartut suliaat tamarmik inuunermik nersorinninniutitut atuarneqarsinnaapput. Tassa inuup ataatsip inuunerata aamma inuiaqatigiit pinngortitallu uumassuseqarnerisa alianartuni, tupinnartuni eqqumiitsunilu ersernerat sammineqarlutik. Nordisk Samarbejde tusagassiuutinut nalunaarummini taama allappoq.

Innersuunneqartuni ajugaasoq Oslomi oktobarip 31-ani nalunaarutigineqassaaq.