Katrine R. Kielsen imminut ujartorsimasoq: Soorlu nalullugu kinaallunga
Katrine Rasmussen Kielsen atuakkiortutut erinarsortartutullu ilisimaneqarpoq. Taanna atuakkanik sisamanik saqqummersitsinikuuvoq. Taassuma atuakkiaani ilisimaneqarluarnerpaaq atuarneqarnerpaarlu “Qivittuissuit akornanniinnikuuvunga” Danmarkimi atuakkani tusarnaagassiani 2022-mi pisiariortorneqarnerpaasuni normu 1-iuvoq.
Katrine Rasmusennilliuna atuakkiorneq qanga aallutilersimagaa?
Atuakkiorneq atuartuullunili nuannarilersimagini, taanna oqarpoq.
1979-imi inunngorpoq.
Paamiuni inunngorlunilu peroriartorpoq.
Uinilu, Anda R. Kielsen, 13-inik ukiulimmik paneqarput aamma 14-inik ukiulimmik erneqarput.
Qimeriaasalersuisartutut ilinniarsimasuuvoq, Tunngaviit Pingasut pillugit ilitsersuisuuvoq atuakkiortuullunilu.
Atuakkiaminik sisamanik saqqummersitsinikuuvoq, 2000-llu aallartinnerani erinarsortartuni "Nivissakkut"-nni ilaalluni.
- Kalaallisut atuartitsisorinikuusara Pavia Kreutzmann nuannarigakku. Pavia atuartitsissalluni iseraangat, atuartut tamatta nipaaruttarpugut.
Atuaqatigiiullutik allattariarsornermik unamminerminni ilaatigut ajugaasarsimalluni, taanna oqaluttuarpoq.
AAMMA ATUARUK Qivittuissuit akornanniinnikuunngikkuit taava tusarnaagassaqarputit
Atuakkiaa siulleq “Matup kasuttornera” 2018-imi saqqummerpoq.
Atuakkiai allat pingasut; "Ersinartulikkersaaqatigisigut", ”Qivittuissuit Akornanniinnikuuvunga” taavalu “Inuuneq oqinnerusoq” tamatuma kingorna saqqummerput.
Taannalu arnaq iluatsitsilluarsimasoq ilisarisimanerulerusullugu KNR-imit oqaloqatigaarput.
Katrine Rasmussen. KIelsenilu imminut ilisaritilerami eqqarsaqqissaqqaalaarpoq.
- Eqqarsaqqaartalernikuugama qassinik ukioqarnerlunga, 42-nik ukioqarpunga.
Katrine Tunngaviit Pingasut pillugit: Qamannga tusaasaqarfigeqqaarpiarpakka
Katrine Rasmussen Kielsen 18-inik ukioqarluni Nuummut nuukkami nujalerisuullatsiarpoq.
- Taamanikkut sivisuumik aalajangersimasumiissinnaannikuunnginnama. Ilinniagaqarniutigiinnarniarlugu qimeriaasalersuisutut naammassivunga. Kisianni Tunngaviit Pingasut pillugit siammarterisutut siorna juunimi ilitsersuisunngorpunga, Katrine Rasmussen Kielsen oqarpoq.
Inuunermini sussanerluni meerartaareerluni nalusimavaa.
- Soorlu imminut nalullunga kinaallunga. Assorsuaq imminut ujartorsuaarnermiippunga. Qanoq anaanaassaanga? Meeqqakka qanoq perorsagassaappat?
Nukarliliani inunngunngitsiartoq nikallungasimaqaluni, Katrine Rasmussen Kielsen oqarpoq. Nikallungarujussuarnermini tarnip pissusiinik ilisimasalimmik oqaloqateqartalersimagaluarpoq, oqaloqateqartarninili ilorraallaatigillatsiaannartarsimavaa. Neriunnerali tassunga killissimanngilaq.
- Taamaallunga arnat marluk nalunngisakka Tunngaviit Pingasut oqaluttuaqattaarusaassutigigaat tusarnaaleqaakka. Tassannga qamannga Tunngaviit Pingasut aallaavigalugit tusaasaqarfigeqqaarpiarpakka, Katrine Rasmussen Kielsen oqarpoq.
Tunngaviit Pingasut tassaavoq inuup eqqarsartaasia qanoq atuuttarnersoq pillugu paasinninnissamut atugassiaq, taamatullu paasinnittaaseqarnermi qanoq aqqutissiuussisoqarsinnaanersoq.
Upperisamut periaatsimullu tunngasuunngilaq, kisiannili inuup ataatsip eqqarsartaatsimigut eqqissitinnissaanut ukkataqarnissamut tunngasuuvoq, nakkutilliinermik iperaanissamut pinngortitaassutsimullu tunniussinissamut tunngasuuvoq.
Tusarfik: Kommuneqarfik Sermersooq.
Katrine Rasmussen Kielsenip Tunngaviit Pingasut naatsumik ima nassuiarpai:
- Tunngaviit Pingasut: Inuunerup nukinga, sianissuseq eqqarsaatinillu tunngassuteqarneranik imaqarpoq. "Asanninnioreerpugut” - “Peqqissooreerpugut” - “Suliassaanngilagut”
- Eqqarsaatit eqqarsaataannaapput. Eqqarsaatillu uanni naammakkunnaariartulermata atuartitsissutigineqalersoq paasigakkuli pilerigalugu paasisaqarfiginerorusullugulu atualeqataavunga.
Taanna ukiut arfinilissaannik namminersortuuvoq, ulluinnarnilu ulapittarluni oqarpoq.
- Massakkut ukiut arlallit namminersortuuvunga maani Danmarkimi. Atuakkiunngikkaangama Tunngaviit Pingasut pillugit zoomikkut ilitsersuisarpunga. Ulluinnarni suliarinerusartakkakka taakkuupput, Katrine Rasmussen Kielsen oqarpoq.
Ilaquttaminik pingaartitsisoq
Katrine Rasmussen Kielsen ulapikkajukkami sunngiffimini ilaqutserinissi pingaartippaa.
- Sunngiffinni meeqqakka ilagisarpakka, ulapikujuttarnermik ukioq naangajallugu ulapittorujussuusaratta, taava sunngiffinnut meeqqat piffissaqarfiginiartarpakka, tassami piffissaqarfigerusuttorujussuusarpakka taakkua.
Uinilu meeqqatik ilaginissaat pisariaqartittarlugu, Katrine Rasmussen Kielsen illalaarluni oqarpoq.
- Naammagittartarnermik ilumoortumik meeqqagut tupinnarnermik, taava ilaginissaat pisariaqarterujussuartaratsigu. Uagut immaqa angajoqqaatut ilaa killormoorpaluttarput ilai, meeqqat angajoqqaanut pisariaqartitsisut, uagut uigalu meeqqat pisariaqartittaratsigu killormut, Katrine Rasmussen Kielsen oqarpoq.
